Gruff Rhys + Manu Chao + Skakeitan + Lou Dalfin + Peppa Marriti Band + Officina Zoè = Babêl Europe 17/2019

La gnove pontade di Babêl Europe, la trasmission cuindisinâl dedicade a lenghis, musichis, minorancis e nazions cence stât, e va daûr di chê di cuindis dîs indaûr. Tal apontament che al cjate spazi intal palinsest di Radio Onde Furlane vuê, martars ai 3 di Setembar, doman, miercus ai 4, e po sabide ai 7, si fevelarà ancjemò novitâts discografichis, di cjançons cul titul intune lenghe divierse di chê che e ven doprade tal test e di concierts e di events.

In chê che e je la pontade numar 17 dal 2019 di Babêl Europe si scoltarà une altre volte, ma intun contest diferent, une des vôs che a jerin stadis protagonistis de ultime trasmission di Avost: e je chê dal musicist galês Gruff Rhys che vie pal ultin an nol à dome colaborât cul ex cjantant dai Blur, Damon Albarn, intal album Egoli dal progjet Africa Express, ma al à ancje metût adun un disc gnûf cjantât par cymraeg cundut dal titul par inglês, Pang!, che al vignarà dât fûr tant che cd e in vinîl de bande de innomenade etichete britaniche Rough Trade a tacâ dai 13 di Setembar.

Dongje de anteprime de gnove produzion di Gruff Rhys, dentri di Babêl Europe si fevelarà di un altri grant personaç babelic, che vie pal Istât al à fat un conciert in Friûl, ven a dî Manu Chao, che ai 11 di Avost stâts al à sunât dongje dal ripâr Gilberti, in bande di Nevee e de mont Cjanine.  

La sô partecipazion al festival No Borders e stiçarà une riflession, che e vignarà compagnade dal ricuart di cualchidune des sôs colaborazions babelichis, in particolâr cun musiciscj de Galizie, dai Paîs Catalans e dal Paîs Basc, de scolte di un toc mieç par euskara e mieç par spagnûl là che l’ex frontman dai Mano Negra al cjante cui Skakeitan di Donostia e di altris dôs cjançons – une par albanês de Peppa Marriti Band e une par ocitan dai Lou Dalfin – che a fevelin in cualchi maniere di lui.

 

Cun chê di fevelâ di events e di ricuardâ concierts che a son stâts in Friûl vie pal Istât, si frontarà ancje l’argoment Notte della Taranta 2019 , l’innomenât festival che si fâs tal Salento e in particolâr inte Grecìe Salentine, e si scoltarà la version di un classic de cjançon par griko fate dai Officina Zoè, che a àn sunât ai 7 di Lui stâts a Sant Zorç di Noiâr.

Radio Onde Furlane si pues scoltâle sui 90 Mhz pe plui part dal Friûl, sui 90.200 Mhz pe plui part de Cjargne e in streaming, di cualsisedi bande dal mont là che e sedi une conession internet, ae direzion www.ondefurlane.eu.

Dopo des trê emissions de setemane (vuê a undis a buinore, doman a une dopo di misdì e sabide a une mieze dopo di misdì), ancje cheste pontade di Babêl Europe si podarà tornâ a scoltâle in podcast cun Spreaker e Spotify.

logo_web

La gnove pontade di Babêl Europe. De Scozie ae Ocitanie: punk, dub e taranta

Doman al è martars e a undis a buinore su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu) al torne Babêl Europe, il program cuindisinâl dedicât a lenghis, musichis, minorancis e nazions cence stât.

Ancje il secont apontament avostan di chest an al larà daûr dai trois musicâi e tematics che a àn segnât chês altris pontadis ladis in onde vie pal Istât. Si scoltaran tocs di ispirazion reggae, dub, eletroniche e punk e si fevelarà di novitâts discografichis e di events.

In particolâr e sarà la ocasion par tornâ a scoltâ une cjançon gjavade fûr di Ar Cànan, Ar Ceòl, Ar-a-mach, il prin album dut par gaelic scozês dai Oi Polloi, jessût tal 2006, par cerçâ un altri toc dal album plui resint dai irlandês Imlé, che a son daûr a regjistrâ alc di gnûf par zontâlu ae sô ristampe in vinîl, proviodude pal Unvier, e par fâ une pontade, cu la version de classiche cjançon par griko Kalinifta fate di Nando Popu, te Grecìe Salentine, là che e je daûr a sierâsi la edizion numar vincj de La Notte della Taranta.

In particolâr si fevelarà di chel innomenât festival e de sô serade finâl, sabide ai 26 di Avost a Melpignano, là che al sunarà ancje Gran Bal Dub.
Juste par chel si tornarà a scoltâ un toc dal progjet metût dongje tai mês passâts di Madaski e di Sergio Berardo dai Lou Dalfin.
Cun di plui, lant daûr des vibrazions e dai rivocs di derivazion gjamaicane, il viaç di Babêl Europe al tocjarà il Friûl dai R-esistence in Dub.

Dopo de prime emission in direte, Babêl Europe al tornarà in repliche su lis frecuencis di Onde Furlane ancje miercus ai 23 di Avost, a une dopo di misdì, e sabide ai 26 a une e mieze, simpri dopo di misdì.

Ancje cheste pontade si podarà tornâ a scoltâle sul sît internet de radio libare dai furlans.

Novitâts discografichis (e no dome chês). Su Onde Furlane al torne Babêl Europe

Discs gnûfs di cerçâ e classics di tornâ a scoltâ, tra colaborazions intercontinentâls, croseris di lenghis, musiciscj di innomine planetarie, storiis, storie e atualitât. Al è chest, in struc, il menù de gnove pontade di Babêl Europe, la trasmission cuindisinâl dedicade ae produzion musicâl tes lenghis minorizadis dal continent, che e torne vuê, ai 4 di Avrîl in direte a 11 a buinore, te programazion di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu).

Il viaç torzeon tra musiciscj, discs, concierts, events e altris iniziativis in cheste ocasion al tocjarà Irlande, Galizie, Grecìe Salentine e, in maniere scalembre e trasversâl, ancje Ocitanie, Sardegne, Friûl e Paîs Basc.

Si tornaran a scoltâ i Avleddha e un altri toc dal progjet metût adun cualchi an indaûr de formazion ocitane La Talvera cul musicist brasilian Silvério Pessoa, si fevelarà di fiestis nazionâls e di imnis cence stât e al sarà spazi par une gnove cerce dal disc de galiziane Ses dal titul Opoñerse á Extinción, jessût ae fin dal 2016, e par une altre novitât di gale che e rive dal Stât spagnûl là che a son coinvolzûts diviers personaçs babelics.

Cheste pontade Babêl Europe e vignarà compagnade ancje di une altre novitât: il program, dongje de emission in direte di vuê e de repliche di doman, miercus ai 5 di Avrîl a une dopo di misdì, al tornarà in onde ancje sabide, cuntune seconde repliche a une e mieze dopo di misdì.

Chi di cualchi dì, chê stesse trasmission si podarà tornâ a scoltâle in rêt, compagn di chê altris pontadis di Babêl Europe, sul sît internet di  Radio Onde Furlane.