Une altre biele serade di musiche, di lenghis, di fieste e di creativitât. Îr l’altri a Moena, tal Teatri Navalge, Suns Ladinia, la manifestazion dedicade ae produzion musicâl tes lenghis minorizadis de Europe alpine e mediteranie, e à mantignût ce che si spieatavisi in cont de cualitât e de varietât des propuestis musicâls presentadis e dal nivel gjenerâl dal spetacul.
In continuitât cun chê che e je la storie de rassegne nassude in Friûl tal 2009 e che di in chê volte si à davuelte a Udin, tai Grisons tal 2011, in Ladinie – simpri a Moena – tal 2013 e in Sardegne, tal 2015, e je stade une serade plene di… Suns. Trê i elements di fonde: cjançons bielis, cjantadis e sunadis ben; teatri plen cuntun public atent e content; conduzion de manifestazion cun snait e cun passion par cure dal atôr e animadôr furlan Michele Polo e de cjantautore fassane Martina Iori.
Sul palc dal Navalge il supergrup ocitan TRIP, il performer sart Arrogalla, il cjantautôr ladin Marco Mattia, il rapper cjargnel Doro Gjat, il cjantautôr de Grecìe Salentine Rocco De Santis, la cjantante rumance She, York e i rockers ladins Berdon a son stâts bulos tes lôr esibizions, che a àn marcât lis diviersis carateristichis di ognidune des propuestis musicâls.
I components de jurie (la ladine Lucia Gross, la furlane Mojra Bearzot, il rumanç Jachen Prevost, l’ocitan Stefano Degioanni, il sart Giancarlo Palermo e il grico Pantaleo Rielli) a àn vût il lôr bon ce fâ par sielzi il vincidôr, ma a àn rivât a cjatâsi in cunvigne sul non di Doro Gjat e su la sô cjançon Discolce, «pe capacitât di contâ une storie contemporanie, cuntune paronance grandonone de metriche, cuntun lengaç musicâl atuâl e lizêr e cuntune presince seniche trative».
Cun di plui a àn dât une menzion speciâl a Is di Arrogalla «pal sunôr potent e alternatîf, che al met dongje lis espressions de tradizion intune produzion di avanguardie europeane».
Intat che la jurie e jere daûr e fâ lis sôs valutazions, il spetacul al è lât dilunc cun doi moments dedicâts ae musiche contemporanie par ladin: la proiezion dal video Zenza de te dal grup Lingue Morte e je stade in chel istès un omaç dedicât ae ativitât di chê band ironiche e pevarine e un ricuart di Valentino Croce ‘Lere’, innomenât personaç dal panorame de musiche contemporanie par ladin, za cjantant di chê formazion e di altris grups fassans; il piçul conciert di Martina Iori e Stefano Merighi al à palesât la vivarosetât de cjançon ladine.
Chê stesse carateristiche e veve cjatât une rapresentazion concrete za vie pe prime part de serade cu lis esibizions di Marco Mattia e dai Berdon.
Propit i cuatri zovins fassans, che a messedin tescj par ladin e rock ruspiôs, a àn cjapât il premi dal public. Par chel ai 3 di Dicembar a saran ancje lôr a Udin, adun cul vincidôr Doro Gjat e cun chei altris grups e soliscj che a son stâts selezionâts tra i cincuante di lôr che a àn fat indenant la lôr candidature, pe serade finâl dal festival european des arts tes lenghis minorizadis Suns Europe.
LIDRÎS E BUTUI 