Napoli – Udinese 2-2 (7-6)

fuarceudinees

Al à reson mister Stramaccioni: chê di nossere e je la partide miôr fate dal Udin in cheste stagjon. L’Udin al piert ai rigôrs e al ven butât fûr de Cope Italie ma al mostre chel caratar, chel snait e chel dinamisim che in masse ocasions a son mancjâts e a varessin coventât cetant.

L’incuintri cul Napoli al ven decidût dai rigôrs e i tîrs dai undis metris a son protagoniscj ancje dentri dal timp regolamentâr. Cun di fat, dopo trê minûts di zûc un fal su Zapata al met i parons di cjase di gjoldi di un penalty: lu bat Mertens e la bale e sbat su la travierse.
La rispueste dal Udin, che al viôt tal cjamp tancj zovins, a tacâ di Jaadi e Aguirre, e rive cinc minûts plui indenant cuntune conclusion di Thereau.

Il Napoli al à un potenziâl plui fuart ma no lo dopre ad in plen, i blancs e neris a resistin e a scombatin e no àn ni pôre ni sudizion e cussì il zuiçâ dai partenopeus tal mieç dal cjamp nol prodûs masse problemis pe scuadre furlane che impen e rive a disfrutâ lis dificoltâts de tierce linie napolitane. Zapata al è protagonist di une biele zuiade e Gargano al cjape un pâl: il prin timp si siere cence goi.

La seconde frazion si vierç sù par jù te stesse maniere de prime. Dopo dodis minûts Jaadi al imposte une azion di cuintripît a pro di Thereau che al segne. Il vantaç dal Udin al ven azerât in mancul di dîs minûts, cul gol di Jorginho, che al colpìs ancje il cûr de scuadre di Stramaccioni. Te ultime part dai novante minûts l’Udin al reste in dîs pe espulsion di Widmer, ma no si fâs meti tal sac dal Napoli che al cîr di fâ valê la sô superioritât numeriche.

Dopo novante minûts la partide e reste inclaudade sul un a un e si va ai suplementârs, là che il Napoli al va in vantatç cuntun golon di Hamsik. L’Udin nol mole e al rispuint cun Kone dopo cinc minûts, a testemonence che nol patìs masse la inferioritât numeriche. Tal secont suplementâr al è ancjemò Kone a meti pôre ai parons di cjase e intal ultin al è Mertens a svicinâsi al gol decisîf.
Si scuen lâ ai tîrs dal discut: te ultime tornade Allan nol rive a butâle dentri, Higuain invezit al segne e il Napoli al continue la sô corse in Cope Italie.

L’Udin al lasse cheste competizion, ma al cjate alc che fint cumò nol veve: une cierte personalitât.
Sperìn che le mantegni ancje pal campionât.

Udinese – Cesena 4-2

FuarceUdinees

L’Udin al torne a vinci, almancul in cjase, e al mostre alc di bon, par sigûr di miôr che tes ultimis garis di campionât. Tal turni sec di Cope Italie cuintri dal Cesena la scuadre di balon furlane e scomence malut – al contrari des ultimis partidis – ma e cres dilunc vie de partide, ancje se i coventin i timps suplementârs par rivâ a vinci e a vuadagnâsi la cualificazion ai Otâfs di finâl.

Sul imprin lis dificoltâts a son soredut in difese: cu la linie a trê che e à problemis di stabilitât e cun Scuffet che al torne a zuiâ a tacâ dal prin minût e al somee patî un ciert disorientament. Al è in chestis cundizions che al rive il gol di Djuric dopo cuatri minûts di zûc.

Il svantaç al sune la svearine pe scuadre di Stramaccioni, che e tache a vuadagnâ supremazie  teritoriâl, ma no rive a jessi pardabon pericolose in atac cun manovris che a metin in dificoltât i romagnûi. Dome dopo vincj minûts Bruno Fernandes al pescje la bale juste par che Allan si invii  inte direzion de puarte aversarie, cuntun slalom su Capelli e Volta e cuntun biel tîr che al finìs tal sac daûr di Agliardi.

Il svint dal un a un al sglonfe lis velis de scuadre furlane, che si svicine al vantanç cun Geijio, che al cjape il pâl. Il doi a un al rive un minût prime de polse cun Bruno Fernandes, che al dopre benon un sugjeriment di Pasquale: bale tal siet.

Il secont timp si vierç cul Cesena che al prove a cirî  di tornâ a dreçâ la sô partide. I ospits a cjatin la vie dal gol cuntune acrobazie di Succi dopo nancje dîs minûts, ma dopo a pierdin Volta, che al cjape un cartelin ros par une sô jentrade pericolose a dam di Bruno Fernandes. L’Udin al patìs il colp – pocje atenzion daûr in ocasion dal gol – e al prove a tornâ a metisi in moviment, ma cence rivâ a disfrutâ la superioritât nmeriche.

I novante minûts si sierin sul doi a doi e l’acès ai Otâfs al ven decidût tai timps suplementârs. Dopo nûf minûts al rive il gol di Evangelista, che cul cjâf al pare dentri un balon che al jere za stât tocjât i Agliardi suntun cross di Pasquale. Il trê a doi al see lis gjambis ai ospits, che a calin, e al dâ fuarce al Udin che tal secont suplementâr al fâs poker cun Thereau.

Pe Cope Italie il prossim incuintri al sarà chel cul Napoli, intan che il campionât al viodarà l’Udin un altri viaç a Milan, cuintri dal Inter. Dopo de partide di nossere l’Udin al somee vê recuperât almancul un tic di caratar e di forme. Cun di plui si à tornât a vodi un bon Bruno Fernandes, zuiadôr che al podarès jessi une vore impuartant propit cuintri de scuadre di Mancini. O viodarìn ce che al nas.