Udinese – Bologna 0-1

udin_neri
Chel che al jere un suspiet cualchi setemane indaûr cumò al è alc di sigûr: se si continue a clamâ il Stadi Friûl Dacia Arena, al è pardabon dificil pal Udin vinci une partide in cjase. Lu à mostrât ad in plen la partide di îr, cul Udin che cuintri dal Bologna al cjapât un pâl, al à straçât une ocasion di aur e al à pierdût.

Dopo trê patis, une in cjase e dôs fûr, l’Udin al à provât a vinci, ma  par vie dal caratar e dal snait de scuadre di Bologne, dal câl de sô atenzion e de sô determinazion e di une buine dose di sfighe, che al è avonde clâr di dulà che e rive, la partide e je lade a finî intune altre maniere: un gol cjapât, nissun fat e nuie ponts gnûfs.

Il prin timp al è ecuilibrât e avonde plasevul, cundut che, ancje par vie de ploie, a son diviers erôrs sei une bande che di chê altre. La prime ocasion, almancul in teorie, e je pal Udin, cuntun biel sugjeriment di Thereau a pro di Matos, che però nol rive a tocjâ la bale.
I blancs e neris a son ancjemò plui pericolôs plui indenant, cun Thereau che al fâs un assist par Kuzmanovic, che al tire cul cjâf e al oblee Da Costa a meti un blec cuntune une biele paradone, intant che Armero nol rive a fâ compagn che cul Milan.

La partide e rive al interval cence goi, ancje parcè che une punizion di Destro e ven neutralizade di Karnezis, Mounier al cjape un pâl e Thereau al ricêf un biel cross di Hallfredsson ma al tire fûr bersai. Il risultât parziâl al somee chel just, sei pal numar di ocasions di gol che pal zûc costruît di Lodi e di Diawara e pal bon dinamisim dai blancs e neris Hallfredsson, Matos e Kuzmanovic e dai bolognês Destro, Giaccherini, Donsah e Mounier.

Te seconde frazion il Bologna al incrès la sô pression ofensive, intant che l’Udin al patìs la iniziative dai aversaris, nol rive a sburtâ indenant e al scugne sierâsi in difese.
I ospits a vuadagnin spazi te fasse mezane cun Donsah e Diawara, ma a fasin confusion tal moment di sierâ lis azions des bandis di Karnezis. Cun chê di dâi plui fuarce ae scuadre di balon furlane, Colantuono al cambie Matos cun Zapata e la sielte e puarte cualchi risultât, par vie che i ospits a pierdin teren e a ridusin l’impat des lôr azions e Thereau al va une vore dongje al gol cuntun tîr che al fâs la barbe al pâl.

Cuatri minûts plui tart de ocasion pierdude pai furlans, al rive il gol di Destro, che al mande in tilt Danilo e Herteaux e al tire a colp sigûr. A chel pont l’Udin al va al atac cun determinazion e cun disperazion.
Colantuono al zuie la cjarte Di Natale, cun Totò che al jentre al puest di Thereau. Donadoni al rispuint cu la jentrade in cjamp di Floccari e lu mande a scombati dongje di Destro, cun chê di mostrâ di no vê pôre de reazion dai parons di cjase.

Il cûr dal tecnic dal Bologna al ven premiât, parcè che la sô scuadre no rive a cumbinâ masse indenant ma e ten bot indaûr, ancje cuntune buine dose di fortune: Felipe al cjape il pâl, Zapata si mangje un gol e i ros e blu a puartin a cjase ducj i trê i ponts a disposizion.

Fiorentina – Udinese 2-0

udin_neri

Une biele partide e une brute sconfite. Il sium di rivâ a zuiâ la finâl di Cope Italie e di jentrâ in Europa League si sfante tal stadi “Franchi” di Florence. E vinç la Fiorentina e al piert l’Udin, che al cjape doi goi, al zuie avonde ben ma no rive a met la bale tal sac, un pôc par sfighe (il pâl cjapât di Di Natale), un pôc par imprecision e un pôc ancje par merit dai aversaris, a tacâ di chei osteâts di ex di Pizarro e Cuadrado.

La Fiorentina si zove ancje de poie fuartonone dai siei tifôs e a un ciert pont ancje de penurie di balons (isal pussibil che cuant che la bale e va fûr no sedi daurman une altre a disposizion?), che impen a saltin fûr ae fin de partide cuant che i parons di cjase jù tirin in curve e in tribune par fâ fieste cul lôr public.

La “viola” soredut e rive a profitâ inte maniere miôr dai erôrs tal mieç dal cjamp de scuadre furlane, che a vegnin stramudâts in iniziativis ofensivis che a rivin ancje a vê sucès, cemût che al sucêt in ocasion dal golon di Cuadrado, tal secont timp.

La partide di nossere e tache ben, in gjenerâl, par vie che si viodin dôs scuadris metudis ben tal cjamp e zuiadôrs che a son in stât di zuiâ cun intensitât, cualitât e motivazion, e in particolâr pal Udin, che al mostre di no vê pôre dai aversaris e si fâs viodi daurman des bandis de puarte di Neto cuntune conclusion di Bruno Fernandes fermade di un difensôr florentin.

Dopo di chestis flamadis sul imprin, l’Udin al cale e e cres la Fiorentina, che e zuie miôr cu la bale par tiere sul curt e cui sugjeriments luncs di Pizarro. Al è cussì che al rive l’un a zero: bale alte che e rive a Joaquin, difese blancje e nere ferme ipnotizade e passaç indaûr par Pasqual che al spare une bombe imparabile par Scuffet.

L’Udin al patìs la bote ma al rive a reagjî, cu la pression di Pereyra e Widmer e cui moviments di Di Natale e Bruno Fernandes. Ator de mieze ore a son almancul trê lis ocasion par rivâ ae paritât, a tacâ di un tîr fûr dal spieli di Di Natale e di une conclusion di Gabriel Silva che e ven mandade in corner di un superNeto. Plui indenant a rivin lis conclusions in acrobazie di Domizzi e di Di Natale che al cjape il pâl a man drete dal puartîr florentin.

Il secont timp si vierç cuntun pâr di erôrs in fase difensive e di impostazion de bande dal Udin, cun cualchi stocade dai parons di cjase che a cjatin la rispueste pronte tai biei intervents di Scuffet. La pression de Fiorentina e diven plui di chestis inciertecis blancjis e neris tal mieç dal cjamp che di une vere volontât di pression. L’Udin al somee masse lunc e i coventin un pôcs di minûts par tornâ a vê une sorte di eculibri e tornâ a sburtâ indenant cun Pereyra e Widmer. Cussì la pression ofensive e torne buine, ma a mancjin o l’ultin passaç o il tîr in puarte, cun dut che al jentre ancje Muriel.

La Fiorentina si difint e e rispuint in cuintripît: al rive cussì il gol di Cuadrado, che al scate e al tire in maniere imparabile.

L’Udin al continue a vê cûr, gjambis e sintiment, ma al stente tal moment di tirâ in puarte, tra tîrs cross, tîrs fûr, paradis di Neto e salvaments dai difensôrs. Il timp al passe, l’Udin al sburte, ma il risultât nol cambie. Si scombat fin tal ultin, cuant che Muriel al clame ancjemò Neto a fâ un meracul e Nico Lopez si fâs cjapâ des striis su la rispueste dal puartîr e al tente, cun premure, di metile dentri cul cjâf e cussì al tire fûr une conclusion flape che e vene neutralizade cence padin.

Ce restial cumò? La sodisfazion pe partide, pe cundizion dai singui, a tacâ di Pereyra e Scuffet, e la delusion pal risultât e pe straçarie di ocasions di gol.

Sperìn che no si pierdin il snait e la grinte mostrade de scuadre in chestis partidis di Cope. A coventin, e tant, ancje pal campionât. Stin calmuts, ma stin dismots!

Udinese – Fiorentina 2-1

bandieris

Une altre biele serade di Cope Italie. L’Udin al vinç par doi a un e al puarte a cjase un piçul vantaç inte direzion dal acès ae finâl di chê competizion. Te partide cuintri de Fiorentina si torne a viodi la scuadre biele di gnot, che e scombat, che no à pôre e che e je in stât di colpî in cuintripît in maniere ciniche e determinade.

Compagn che pôcs dîs indaûr cuintri dal Bologna in campionât, Guidolin al induvine dutis lis sieltis. Di Natale in cjamp dal prin minût al zuie il prin timp cun snait, esperience e voie di sacrificâsi e al fâs ancje il prin gol. Muriel al jentre te ultime part e i fâs zirâ i tabars a dute la difese colôr di viole, cui siei moviments e cu lis sôs conclusions: une zirade alte e une canonade milimetriche, chê decisive, che e sbat tal pâl e si ferme te puarte di Neto, che par almancul dîs minûts al reste a bocje vierte a domandâsi ce zîr che al à fat il balon. Widmer al conferme che te sô corsie al passe dome lui, che al è al servizi de scuadre sei cul balon che cence e che soredut al cor sù e jù cence padin e cun dutis lis acelerazions e lis verticalizazions che a coventin. In puarte Scuffet al è une sigurece, tra i pâi e fûr – biele la jessude sui pîts di Matri – e cu lis mans – i da ancje un biel scufiot a une bale pericolose butade tal mieç di Joaquin – e cui pîts. E Pereyra al masane cjamp e balons, al sugjerìs e al cuvierç e al à par sigûr i siei merits ancje te confezion dai doi goi furlans.

La partide e tache ben. La ploie no je la uniche protagoniste: a son ancje la Fiorentina e l’Udin.
I blancs e neris a mostrin di vê plui iniziative e la prime conclusion de gare e je di Nico Lopez dopo passe vincj minûts. Si fâs viodi indenant ancje la scuadre di Montella, cuntun tîr fûr bersai di Vargas, ma passade la prime mieze ore al è ancjemò l’Udin che al sburte indenant, cun Di Natale che i da un biel balon a Pinzi: tîr, rispueste di Neto e conclusion fûr di pôc di Pereyra.
Cul savê di dopo, si pues calcolìalu tant che un avîs dal gol: cuatri minûts plui tart Pereyra al scate in verticâl tal mieç dal cjamp, al zire a drete par Widmer che al jentre in aree e al passe a Totò, che al torne finalmentri a segn ancje su azion.

La Fiorentina e patìs il colp. Però e reagjìs daurman, ma e rive a bati Scuffet dome cuntune bordade imparabile di Vargas prime dal interval: un a un.
Tal secont timp Guidolin al lasse fûr Di Natale, che no i à plasût par nuie cemût che al è stât butât jù di Gonzalo Rodriguez e al met dentri Bruno Fernandes. La Fiorentina e cjape in man il balin de partide, cul possès de bale e cu lis conclusions di Joaquin e Matri, ma no rive a mudâ il risultât.
L’Udin, dopo vê patî la incressite de intensitât dal zûc dai aversaris, e recupare cjamp e iniziative. Montella al fâs jentrâ l’ex Cuadrado e Guidolin al mande dentri Badu par Pinzi e Muriel par Nico Lopez. L’intindiment dal mister di Castelfranco di dâ gnove energjie ae sô scuadre, intun moment là che la Fiorentina e somee contentâsi dal un a un, si concretize cun gnovis acelerazions di Pereyra e Widmer e cu lis conclusions di Muriel: la prime e va indalt, la seconde e va dentri e al è doi a un.

Al è ancjemò timp par scombati e par resisti. In spiete de tornade di Florence, là che si varà di scombati ancjemò par rivâ ae finâl de Cope. E ancjemò prime in spiete de partide di campionât cuintri dal Chievo, là che si varà di lâ indenant su la strade vierte a Bologne.

Cussì, ancje se o riscjìn di tornâ a scrivi chê e simpri chê, al covente stâ contents – anzit, contentons – ma al covente ancje continuâ a stâ calmuts.

Milan – Udinese 1-2

bandieris

L’Udin al torne a cjase di Milan cu la cualificazion aes semifinâls de Cope Italie. La scuadre blancje e nere si conferme biele di gnot, compagn che cuintri dal Inter inte stesse competizion e cuintri dal Napoli in campionât passe un mês indaûr. No si sa se e je une vere resurezion, par sigûr chê di nossere e je stade une serade storiche e une ocasion par gjavâsi vie la maluserie des ultimis zornadis e par frontâ, cun energjiis gnovis, lis prossimis partidis in campionât e par vê gole di scombati par rivâ ae finâl di Rome.

Guidolin al presente une scuadre zovine e frescje, che e scomence malamentri e e cjape un patafon di Balotelli dopo sîs minûts, ma no si piert pai trois, e masane corse e balons e e rive a mandâ in tilt un Milan flap e cence morbin.
Il disorientament dal Udin al dure sù par jù un cuart di ore e ae scuadre furlane i coventin ancjetancj minûts par rivâ al tîr cun Badu e par cjapâ il control dal incuintri, fâi pôre al Milan e sierâ il prin timp cul risultât di paritât.

Bruno Fernandes al prove con sucès a zuiâ di fin, Muriel al zire a corint alternade ma cuant che al lûs al è sflandorôs, daûr la difese e siere ben sui tentatîfs di dialic strent di Balotelli e Kakà, intant che Allan, Badu e Widmer cul passâ dai minûts a fasin cressi pression e dinamisim in verticâl.
L’un a un al rive propit di une percussion dal zuiadôr svuizar, che al bruse Emanuelson e lu oblee a fermâlu in maniere iregolâr: rigôr, realizazion di Muriel e Milan in zenoglon.

Il secont timp si vierç cul Udin che al manten il control des operazions: il Milan al è smamît, intant che Bruno Fernandes, Muriel e Lazzari a tirn in puarte cun pocje precision. La reazion milaniste e je dute tes iniziativis di Balotelli, ma Brkič al rispuint ben, soredut in ocasion di une punizion sparade cun fuarce e precision de bande di SuperMario.

L’Udin al manten la sô supremazie, che zi zove de energjie e de iniziative puartade de jentrade in cjamp di Pereyra al puest di Bruno Fernandes e, cualchi minût indenant, di Nico Lopez al puest di Muriel. Propit il zovin uruguaian al controle inte maniere miôr une bale une desene di metris dopo de linie mezane e al partìs in verticâl te corsie centrâl e al mole un tîr in diagonâl che al finìs là che Abbiati nol rive: doi a un.

In altris ocasions – par esempli domenie stade cuintri de Lazio – l’Udin intune situazion di cheste fate al sarès stât bon di sierâsi indaûr e di fâsi travanâ dai aversaris. Nossere no je lade cussì, soredut par merit dal Udin, che si à mantignût alt cun Nico Lopez e Pereyra, sapontâts des incursions di Widmer su la corsie di drete, e no si à fat cjapâ des striis in difese e tra i pâi, ma ancje par vie che il Milan nol à rivât a imbastî nissune azion di atac, a part un pâr di tentatîfs di Balotelli che però no i fasin pôre a Brkič.

E cussì la partide e finìs in glorie pai blancs e neris che a mandin il diaul milanist al infier e a parin vie ancje cualchi altre fantasime.
La ultime cartuline di San Siro e je une biele inmagjin che e fâs pensâ e sperâ ben: ducj cuancj i zuiadôrs dal Udin sot de curve dai tifôs furlans, daûr de solecitazion di Di Natale, che al mostre cemût che si pues zovâ ae scuadre, cun personalitât e cun snait, ancje cuant che no si zuie e si reste in bancjine cu la gjachete intor.

Udinese – Inter 1-0

fuarceudinees

Une discuvierte dople: e esist la Cope Italie e soredut e esist ancjemò une scuadre che si clame Udinese. Dut chest al salte fûr de partide di nossere dal Udin cuintri dal Inter, vinçude dai blancs e neris par un a zero.
La scuadre di Milan si conferme la vitime miôr dai blancs e neris, compagn che sù par jù un an indaûr in campionât. Tal incuintri dai Otâfs di finâl l’Udin al mostre une muse une vore diferente di chê de partide di lunis cuintri dal Verone e di chê di tantis altris ‘zornadis no’ viodudis vie par cheste stagjon. Al vignarès di dî: dute une altre muse, dute une altre scuadre.

Guidolin al imbastìs une scuadre ben struturade, fuarte te fasse mediane cun Pinzi, Badu e Allan, cun Widmer e Allan tes laterâls, in difese cun Heratux, Domizzi e Danilo, cun Kelava tra i pâi e Nico Lopez e Maicosuel in atac.
L’Udin al partìs ben, al masane zûc e si rint pericolôs indenant cun Nico Lopez e cul Mago. L’Inter al patìs e al rispuint ae scuadre furlane cence rivâ a fâsi viodi des bandis di Kelava.

Doi minûts dopo de prime mieze ore di zûc al rive il gol dal Udin: Allan al zire la bale su Nico Lopez che al viôt Maicosuel, il brasilian al ricêf il sugjeriment e cussì lu concretize cence masse fastidis.
Il gol al da la svearine al Inter, che al rispuint cuntun pâr di conclusions, al cjape une travierse cun Kuzmanovic, ma nol rive a cjatâ la strade pal gol.

Tal secont timp al jentre Palacio e chest al zove ae pression ofensive dai ospits. L’Udin al ten bot, si difint e al rispuint prime cun Maicosuel in cuintripît che al servìs Pinzi e plui indenant cun Badu, Nico Lopez e Widmer.
L’Inter al è in confusion tatiche: Mazzarri al cambie la fisionomie de sô scuadre ma nol rive a cjatâ nissune maniere par dreçâ la partide, intant che l’Udin al difint il vantaç, al puarte a cjase la cualificazion e – sperìn – ancje la cussience di jessi une scuadre in stât di zuiâ, di scombati, di vinci, di no vê pôre di nessun.

Cumò al è impuartant che cheste cussience e cheste cundizion agonistiche, tatiche e tecniche a vegnin mantignudis tai prossims impegns di campionât e di Cope Italie. Par che nol sedi dome un biel sium di une gnot di invier.