Furlan: dirit di fonde e lenghe europeane e di Liberazion

 lengate1

Ancje chest an il Comun di Udin al à metût fûr il manifest pe Fieste de Liberazion scrit par furlan.
E je une iniziative che no si pues fâ di mancul di preseâle, par plui motîfs, a tacâ dal fat che la lenghe furlane e je stade une des lenghis de lote partigjane in Friûl e une des lenghis tibiadis de bande dal Fassisim cul so fanatisim nazionalist e antidemocratic. Cence dismenteâ che – e nol è un câs, de Cjarte di Chivasso ae Resistence furlane e slovene – la tutele des minorancis linguistichis e je une dai principis di fonde de Costituzion de Republiche taliane, che lis sôs lidrîs a son juste inte lote di Liberazion.

Par chel si cjatìn in cunvigne sei cul spirt de iniziative cjapade sù dal Comun sei cu lis riflessions in cont di chest argoment che si cjatin achì.
Cun di plui, nus fâs plasê che il sindic de Capitâl dal Friûl al vedi ancje fevelât par furlan intant dal so discors uficiâl di sabide stade in Place Libertât, cemût che si pues lei culì. Nus fâs plasê ancje che al sedi stât ricuardât il principi di fonde de Costituzion de Republiche taliane, che si cjate tal so articul 6, e che al sedi stât dit che «chest pinsîr di libertât civîl al à di compagnânus ogni moment che o doprìn la lenghe furlane e, juste par chel, al à ancje di sburtânus a doprâ il furlan in dutis lis ocasions».

Udin25diAvril2015

In cont di tutele des minorancis, di principis di fonde de democrazie e dal furlan tant che lenghe di Liberazion e tant che lenghe europeane, a meretin segnalâts doi apontaments che a son stâts la setemane stade a Udin, ai 20 di Avrîl, e a Rome, la dì dopo: un incuintri alì de Regjon cul viceministri pai internis cu la deleghe pes minorancis linguistichis, Filippo Bubbico, e une audizion in Senât li des Comissions Afârs istituzionâls e Afârs forescj.
In dutis dôs lis ocasions la ARLeF (Agjenzie Regjonâl pe Lenghe Furlane) e il Comitât/Odbor/Komitaat/Comitato 482 a àn palesât la lôr opinion in cont de ratifiche de Cjarte europeane des lenghis regjonâls o minoritariis, che di chê si torne finalmentri a fevelâ in Parlament.

La ratifiche – a àn sclarît i rapresentants dal organisim regjonâl di politiche linguistiche par furlan e dal Comitât che al ten dongje une trentine di realtâts associativis espression de comunitât furlane, slovene e gjermaniche dal Friûl – e à di jessi une «ratifiche buine »: e à di previodi cundizions di tutele che no son di nivel inferiôr di ce che al è za previodût tes leçs statâls e regjonâls che a son in vore.

schiavi_palermo

Rapresentants de ARLeF e dal Comitât 482 a àn presentât il lôr pont di viste comun in cont de ratifiche ancje a Rome, là che a àn fat indenant cualchi osservazion di merit in cont dai ûs publics de lenghe, de scuele e dai media e a àn consegnât un document là che si cjate une sorte di comparazion dai contignûts dai doi disens di leç di ratifiche che a son in discussion e duncje une valutazion di cemût che a son coerents cu la normative.

Vie pal incuintri di Udin, là che a jerin ancje i parlamentârs Carlo Pegorer e Tamara Blažina, il prefet di Udin, Provvidenza Delfina Raimondo, e diviers rapresentants dal Consei regjonâl e de Universitât dal Friûl, il president de ARLeF, Lorenzo Fabbro, al à frontât ancje altris cuistions che a tocjin la tutele de minorance linguistiche furlane, a tacâ de necessitât di intervignî pe formazion e il ricognossiment professionâl dai insegnants di/in lenghe furlane cu la creazion di une classe di concors di pueste e de dibisugne di previodi, tal gnûf Contrat di servizi tra il Ministeri des Comunicazions e la Rai, chê programazion radiotelevisive in lenghe furlane che si varès di fâ za di cuindis agns incà daûr de leç 482/1999.

In chê stesse ocasion Bubbico al à cjapât sù ancje il pont di viste dal Comitât 482, rapresentât di Carli Pup, che tal so intervent al à marcât cemût che lis cuistions di Fabbro e condividudis ancje di Serracchiani, Panariti e Torrenti, a sedin in sintonie cu lis istancis presentadis dal associazionisim.
Il puartevôs dal Comitât 482 al à stiçât il rapresentant dal Guvier ancje su la cuistion des cjartis di identitât bilengâls, stant che al coventarès slargjâ chest servizi, che al è za previodût pai citadins di lenghe francese de Val di Aoste, di lenghe slovene dal Friûl e di Triest e di lenghe todescje e ladine dal Trentin-Sud Tirôl, ancje a chês altris comunitâts minorizadis ricognossudis, a tacâ dai furlans e dai gjermanofons dal Friûl che, cun dut che a son stadis za fatis indenant richiestis specifichis tal passât, fin cumò no àn ancjemò vût rispueste in cont di chest argoment.

Tutele des minorancis, il Comitât 482 al fâs sintî la vôs dal Friûl a Rome

lengate1

Il Friûl al mostre la lenghe e al fâs sintî la sô vôs a Rome in cont de tutele des minorancis e dai dirits lingusitics de sô int. Martars ai 16 di Setembar, a Rome, li dal Senât de Republiche taliane al è stât un incuintri tra une delegazion espression des comunitâts di lenghe furlane, slovene e todescje dal Friûl e des istituzion di chenti e il senatôr Francesco Palermo, prin firmatari dal gnûf disen di leç di ratifiche de Cjarte europeane des lenghis regjonâls o minoritariis.

Vie pal incuintri, inmaneât de bande dal Comitât/Odbor/Komitaat/Comitato 482, che al à vuidât la delegazion cu la professore Silvana Schiavi Fachin, si à fevelât dai problemis che a son inte metude in vore de Leç 482/99 e dai contignûts dal disen di leç di ratifiche de Carte europeane.

A son stadis frontadis ancje lis cuistions che a tocjin la formazion dai insegnants di e in lenghe minoritarie, il ricognossiment des lôr competencis, la gnove riforme dal Titul V de Costituzion e la atribuzion ae Regjon Friûl-VJ de competence primarie in cont de istruzion. Par une regjon speciâl, che e je tâl par vie de rilevance de presince di citadins che la lôr lenghe e je diferente di chê taliane, e covente une scuele speciâl, che e sedi in stât di dâ garanziis ai siei citadins dal dirit ae istruzion te lenghe proprie e tes lenghis dal teritori.

Al incuintri e je intervignude ancje al presidente de Regjon Friûl-VJ, Debora Serracchiani.

La iniziative e somee jessi stade plui concrete di altris sù par jù compagnis cjapadis sù cualchi an indaûr. Cun dut achel il so impat si podarà valutâlu dome denant di risultâts concrets che a tocjin lis competencis de Regjon tal cjamp de istruzion e lis risorsis e lis azions a pro di di une presince normâl des lenghis furlane, slovene e todescje tes scuelis, tai media e te vite publiche.

In cont de ratifiche de Carte europeane de bande dal Stât talian, al è impuartant che cheste ‘pratiche’ e vegni sierade,  ma soredut al covente che la ratifiche e sedi une ratifiche buine, ven a dî che i impegns cjapât sù a sedin almancul ai nivei di intervent previodûts des leçs statâls 482/1999 e 38/2001.
Su chest argoment al merete ricuardât che il Stât talian al à za ratificade, ancjemò tal 1997, une altre convenzion dal Consei di Europe su la tutele des minorancis –  la Convenzion di suaze pe protezion des minorancis nazionâls – ma magari cussì no al stente une vore tal rispietâ i impegns cjapâts sù.

Altris informazions in cont dal incuintri dai 16 di Setembar si cjatin achì, achì e achì.

Furlan e Regjon, «E je ore di dâsi une dreçade»

lengate1

Turin al è avonde lontan dal Friûl, ma nus somee che le vin nasade juste.
La situazion de tutele de minorance linguistiche furlane, de sô lenghe e dai dirits linguistics e je malamentri – pulp, pulp, pulp o ancjemò piês – e il cambiament di guvier regjonâl nol à puartât chei mudaments che si spietavisi e che a coventin.

Al è stât fat alc – la ARLeF e à tornât a tacâ a funzionâ , al è stât fat bon il regolament pe certificazion linguistiche, il Consei regjonâl dal Friûl-VJ al è jentrât tal NPLD, il network pe promozion de diversitât linguistiche in Europe – ma a son un grum di robis di fâ e o sin ancjemò te situazion denunciade de bande dal Comitât/Odbor/Komitaat/Comitato 482 ae fin dal an passât.

Juste îr prin di misdì a Udin e je stade fate une conference stampe là che sedis entitâts associativis, agregativis e informativis di lenghe furlane a àn fat une sorte di belanç de azion de zonte Serracchiani sù par jù dopo un an di cuant che e je jentrade in cjarie e a àn domandât al Guvier de Regjon e al Consei regjonâl di «dâsi une dreçade» e di «cambiare verso».

Parcè che, cemût che si pues lei achì, a coventin garanziis di cualitât, di cuantitât e di continuitât e a coventin strategjie e programazion.

Il biel dal Friûl e il brut de cuote 0,02 %

pfloc

Doi dîs di musiche furlane gnove, fuarte e plurâl li dal teatri Palamostre di Udin. Ai 30 di Novembar e je la finâl de edizion 2013 dal Premi Friûl e il prin di Dicembar al sarà timp di Musiche*.
Il storic concors inmaneât di Radio Onde Furlane, che di trente agns incà al sburte e al valorize la produzion musicâl contemporanie par furlan e ta chês altri lenghis minorizadis de Patrie, chest an ancjemò plui che in passât al à palesât il so valôr sei pe promozion di lenghis, dirits e cussience che par sburtâ la vivarositât de produzion musicâl contemporanie par furlan, par sloven e par todesc. Al è stât ator pal Friûl, cemût che o vin contât, e cumò al rive a Udin, te sô capitâl, cuntune serade di alt nivel, plene di varietât, di energjie e di cualitât.

carnicats1

Tra selezions dal vîf e vôts par internet, a rivin in finâl sîs concorints: i Mataleao, cul lôr jazzcore che al pete fuart; i zovins cjargnei Terenzio Blues Band cul lôr blues spontani, scalembri e ingnervât di funk e rock; i ironics e cuadrâts Aldo Sbadiglio e la famiglia Ananas in vacanza a Dresda; i Truc, sclets e ruspiôs tra punk rock e stoner; i Sons of a Gun, band indiepunk des Vals dal Nadison che e cjante par sloven, a conferme di cemût che il Premi al sedi un pont di rifeirment par dut il Friûl, e l’Ensemble d’Anjou, formazion di ispirazion folk revival che e à za vuadagnât il premi dal public, su la fonde dai vôts esprimûts cun internet. Cun di plui, daûr di une tradizion consolidade, a saran ancje i ospits speciâi. In cheste vieste si presentaran li dal Palamostre i Carnicats: l’innomenât trio di rappers cjargnei al regalarà al public dal Premi Friûl une anteprime dal sô gnûf spetacul intune formazion che lu viôt compagnât di un grup di musiciscj che a sunin dal vîf.

sunsantologjie

Il conciert dai Carnicats si pues calcolâlu ancje tant che une anticipazion di ce che al sucedarà tal daspomisdì di domenie, cuant che a tacâ di cinc e mieze al sarà timp di Musiche*, un altri apontament che al jude a capî tant in cont de situazion de musiche furlane. Chest viaç a vignaran idealmentri cjapâts dentri ducj i ultins passe vincj agns di cjançons, discs, grups e soliscj. Cun di fat l’event in program si propon tant che presentazion di gale dai trê volums (cd plui librut) di ‘Suns. Antologjie de gnove musiche furlane’, curâts di Luigi Gregoris e Marco Stolfo e editâts di Nota e ARLeF.
Pe ocasion si podarà viodi e scoltâ cuatri pilastris di dut il panorame di artiscj che a metin dongje musiche e lenghe furlane, ven a dî Mitili FLK, Arbe Garbe, Lino Straulino e Luigi Maieron.

A son dôs ocasions là che si podarà tornâ a viodi che al esist un Friûl vîf, tratîf e creatîf, che al mostre la sô diversitât e la sô specificitât, lis vîf, lis pant e al torne a inventâlis cun braùre, cun umiltât, cun personalitât e cun snait. Al è chel Friûl, che al mostre la lenghe e la muse, che si fâs cognossi e preseâ ator e che si met in relazion positive cul mont, stant che al rive a metisi in relazion positive cun se stes. Al è chel stes Friûl che si cjatìn a discuivierzilu e a fâlu discuvierzi in tantis ocasions, par esempli vie pai incuintris fats in chescj mês inte suaze di La mia lingua suona…IN TOUR.

lengate1

Magari cussì no, però, nol è dome chest Friûl che al esist e che al è biel di viodi e di scoltâ, che al è “cool” e ancje “di esportazion”.
La cronache di chescj dîs nus conte ancje di un Friûl che al resist, che al scuen scombati e che al è menaçât. Cun di fat, di ce che o sintìn ator, ancje chest an par viodi la lenghe furlane tes scuelis, insegnade e doprade intune maniere normâl o almancul decente, al coventarà clamâ “Chi l’ha visto?”, cun dut des leçs di tutele e dai dirits formalmentri ricognossûts.
Chês stessis leçs e chei stes dirits a restin dome su la cjarte e magari a riscjin di disparî ancje di li. Lu fâs savê il Comitât-Odbor-Komitaat-Comitato 482, che al ten dongje associazions e altris entitâts espressions des comunitâts furlane, slovene e gjermaniche dal Friûl, che cualchi dì indaûr al à dât fûr un document plen di dâts e di elements obietîfs che al fâs vignî i sgrisui.
Di chel test (che si pues leilu achì) al salte fûr che par cumò la gnove aministrazion regjonâl no à fat ancjemò nuie tal setôr de tutele des minorancis linguistichis e che, cun dut che si spietavisi un cambiament positîf de bande sô, chê stesse e agjìs pericolosamentri in continuitât cun chê di prime che in cinc agns e à maltratât lenghis e dirits linguistics e in particolâr i à fat cuintri ae lenghe furlane.
E salte fûr une mancjance di cussience, di cognossince e duncje di strategjie, che si palese intun dât che di bessôl al lasse scaturîts: se nol cambie alc dopo de iniziative dal Comitât-Odbor-Komitaat-Comitato 482, te finanziarie regjonâl pal 2014 la cuote dal belanç de Regjon destinade pe lenghe furlane e sarà dome dal 0,02%.

In cont di cheste situazion si pues lei alc di plui ancje achì e achì.
Al è ben jessi informâts e stâ in vuaite. A pro dal Friûl biel di viodi e di scoltâ di cumò, che al cjante e al sune il mont e pal mont. A pro di un Friûl di vivi e di vê alc a ce fâ cun lui cumò e ancje pal avignî.

Dôs bielis gnovis: tiere, lenghe e libertât

bandieris

Lis gnovis di chescj dîs, pal plui, a fasin vignî i sgrisui. Però a’nd è almancul dôs che a tocjin il Friûl e che o podìn calcolâlis tant che buinis.

La prime e je di sù par jù une setemane indaûr, cuant che al è saltât fûr che Edipower al à rinunciât in maniere definitive al so progjet di dopleâ la centrâl idroeletriche di Somplât. Cuintri di chel progjet, che al varès condanât a muart il Lât di Cjavaç cence nancje puartâ zovaments di cualchi sorte ae popolazion, i comitâts a vevin metût in vore iniziativis e mobilitazions. A son stâts propit chei che a àn mandât ator la buine gnove de decision dai aministradôrs di Edipower, cemût che si pues lei achì.

La seconde e tocje la tutele des minorancis, i dirits linguistics e in particolâr la lenghe furlane. La Cort Costituzionâl, cu la sô sentence numar 215 dai 18 di Lui, e à sclarît che no à nissune fonde juridiche la distinzion tra minorancis di serie A e minorancis di serie B, fate indenant de bande cussì clamade “spending review” un an indaûr.

Che il proviodiment fat bon dal Guvier Monti, là che si fevelave, di une bande, di minorancis “di lingua madre straniera” e, di chê altre, di comunitâts definidis daûr dal ûs di “particolari dialetti” e fos une robe cence mani e cence sens, di plui ponts di viste, al jere za clâr in chê volte.

Cumò no son plui dubis: la cuistion e je sclaride ancje ta chest comunicât dal Comitât/Odbor/Komitaat/Comitato 482.

cumò si à di movisi in maniere consecuente, visantsi che no je tant une cuistion di puescj di dirigjent scolastic.
La indicazion d sostance che e rive de sentence de Cort Costituzionâl e je clare: si à di movisi par meti in vore pardabon e par ben la legjislazion di tutele che in tancj cjamps – e in particolâr ta chel de scuele – e esist dome su la cjarte (e tancj no rivin nancje a leile alì…).

Gnovis de Ocitanie e ancje dal Friûl

001304_bandiera_OC

Al è saltât fûr che nol è tant il numar di Zenâr 2013 di Nòvas d’Occitània, il periodic di informazion in rêt che al cuvierç dutis lis tieris “d’Oc”e lis minorancis linguistichis dal Piemont e di inaltrò intal Stât talian e ator pe Europe.

Un dai articui publicâts al da cont di un gnûf “manifest ocitanist” che al è stât prontât inte “Occitània Granda” su la fonde di un dibatiment vivarôs e inte suaze di une schirie di iniziativis e mobilitazions.

Il numar 120 di Nòvas d’Occitània al cjape dentri ancje il comunicât pe stampe dât fûr di Comitât/Odbor/Komitaat/Comitato 482 e Comitât pe autonomie e pal rilanç dal Friûl su fats, cifris e peraulis in cont di minorancis, tutele e autonomie inte Regjon Friûl-VJ.

Mancul dal 0,1% dal belanç de Regjon

lengate1

La presince rilevante des minorancis linguistichis e la lôr tutele a son la fonde plui impuartante de autonomie speciâl de Regjon Friûl-Vignesie Julie.
Sei di un pont di viste storic che  soredut cuntune vision di prospetive, chest al è pardabon un resonament che al à mani. Cun di plui, su chest argoment si cjatin sù par jù ducj cuancj in cunvigne, ancje i vertiçs istituzionâi de Regjon, che avonde dispès a fasin declarazions publichis là che si marche propit in chest sens il valôr dal caratar multilengâl e multiculturâl de comunitât teritoriâl che e ten dongje il Friûl e Triest.

Chest fat al somearès alc di positîf, se nol fos che lis peraulis a van intune direzion impen che i fats a van di une altre bande.
Cun di fat, al à reson Sandri Carrozzo, che tal so blog timp indaûr al scriveve che no àn nissune credibilitât chei che a fevelin di autonomie speciâl e tutele des minorancis e intant a agjissin intune maniere diferente e contrarie.
Chest al saltave fûr za intant des conferencis regjonâls su la tutele des minorancis slovene e furlane, fatis tai mês di Otubar e Novembar dal an passât.
E chest al cjate conferme ulteriôr te Finanziarie regjonâl, cemût che a marchin intun comunicât il Comitât/Odbor/Komitaat/Comitato 482 e il Comitât pe autonomie e pal rilanç dal Friûl.

Daûr di ce che si lei, pe Regjon autonome Friûl-Vignesie Julie lis minorancis linguistichis e la lôr tutele a valin mancul dal 0,1% dal belanç regjonâl. Probabilmentri parcè che, plui che la autonomie speciâl, a chescj sorestants ur interesse la fantomatiche “Macroregjon dal Nord Italie”, dulà che il Friûl e ancje Triest a vegnaressin scjafoiâts….

PS. Il comunicât al è chel chi: comunicatcom4821601013
PS2. Sul argoment al merete cjalât ancje il blog dal Comitât/Odbor/Komitaat/Comitato 482:
http://com482.blogspot.it/2013/01/pe-regjon-no-valin-nancje-il-01-dal.html.

Conference regjonâl su la tutele de minorance linguistiche furlane

Vuê si davuelç a Udin la prime Conference regjonâl su la tutele
de minorance linguistiche furlane.

E varès di jessi une ocasion par fâ il pont de situazion su la metude in vore
de Leç regjon
âl 29/2007 su la tutele, la promozion e la valorizazion de lenghe furlane.
Al è il pericul che al sedi dome un moment di propagande eletoralistiche.

Par sghindâ chest pericul e cjalâ in muse le realtât, o segnalìn
il comunic
ât dal Comitât/Odbor/Komitaat/Comitato 482,
che al ten dongje associazions e altris entit
âts des comunitâts
furlane, slovene e gjermaniche dal Fri
ûl.

Lu cjatais achì: http://com482.blogspot.it/2012/11/cemut-sino-cu-la-metude-in-vore-de-lec.html.