Goulamas’k + A Ricuccata + Ekhi Lambert + Anari + Avleddha + Massilia Sound System + Black is Beltza = Babêl Europe 10/2021

Su Radio Onde Furlane al torne Babêl Europe, il program cuindisinâl dedicât a lenghis, musichis, minorancis e nazions cence stât.

Inte pontade numar 10 dal 2021 la plui part dal spazi e sarà dedicade a gnovis produzions discografichis che a rivin de Ocitanie e de Corsiche, cu lis cercis dai albums gnûfs dai Goulamas’k, saltât fûr che nol è tant, e di A Ricuccata, che si veve tacât a discuvierzilu un mês indaûr, e cun cualchi anticipazion in cont dal disc gnûf dai Massilia Sound System.

Il viaç “babelic” al cjaparà dentri ancje la Grecìe Salentine cu la musiche dai Avleddha e il Paîs Basc, fevelant di cjançon di autôr, di cine e di television. Si ricuardarà il film di animazion Black is Beltza, che juste in chestis setemanis al è in programazion su Netflix, e si scoltarà une cjançon di Anari, che e fâs part dal so coment musicâl, e une di Ekhi Lambert, artist de Basse Navare, tal Stât francês.

Si fevelarà ancje dai risultâts des elezions di joibe stade in Scozie e in Gales, lant daûr dal articul di Ethnos & Demos che ju presente e ju analize, e di Bogre, il cine gnûf dal regjist ocitan Fredo Valla.

L’apontament di cheste setemane cun Babêl Europe al è in direte vuê, martars ai 11 di Mai a 11, e po in repliche tal dopo di misdì di miercus ai 12 (h. 13) e di sabide ai 15 (h.13.30) sui 90 Mhz inte plui part dal Friûl, sui 90.200 Mhz in Cjargne e in streaming in dut il mont.

Dopo des trê emissions di cheste setemane, ancje cheste pontade di Babêl Europe si podarà tornâ a scoltâle in podcast sul Spreaker e sul Spotify di Radio Onde Furlane.

This image has an empty alt attribute; its file name is logo_web.png

Suns Europe 2020, dai 22/8 ai 19/9 in Friûl sunôrs, visions e peraulis pal rispiet dal dirit ae lenghe e dal dirit ae diversitât

Suns Europe al torne, al mude un tic la sô muse e al manten, rinfuarçantlu ancjemò di plui, il so spirt furlan e internazionâl. La edizion di chest an dal festival european des arts intes lenghis di minorance, inmaneât de cooperative Informazione Friulana, la cjase editore di Radio Onde Furlane, cul jutori finanziari de Regjon Friûl-VJ e de ARLeF (Agjenzie Regjonâl pe Lenghe Furlane) e cu la poie dal Comun di Udin e dal Etxepare Euskal Institutua dal Paîs Basc, no si davuelç jenfri la fin di Novembar e i prins di Dicembar, ma e sarà une rassegne estive.

Il cambi di stagjon nol è l’unic element di novitât di Suns Europe 2020. Cun di fat inte sezion musicâl nol è previodût nissun concors: nol è stât dât fûr nissun bant, no je stade fate nissune selezion e nol vignarà dât nissun premi. Cundut achel, tra musiche, cine e leterature, ancje chest an al sarà cetant – e cetant bon – ce scoltâ, ce sintî, ce viodi, ce cjalâ e ce lei. Tacant de serade di sabide 22 di Avost fintremai al ultin apontament dai 19 di Setembar al sarà un mês di sunôrs, di visions, di peraulis, di storiis, di personis e di progjets, espressions vivis e vivarosis di une Europe unide e plurâl, che e domande a fuart il rispiet dal dirit ae lenghe e dal dirit ae diversitât.

Suns Friûl, musichis e lenghis dal Friûl diferent e plurâl
Il program al vignarà screât cun Suns Friûl, vetrine de produzion musicâl contemporanie tes lenghis “altris” dal Friûl. Sul palc di Place Venerio a Udin, tacant di nûf di sere, a saran Corte di Lunas, Alvise Nodale, Dissociative TV e Brût & Madone, che a mostrin cemût che la lenghe furlane e pues vignî doprade in maniere une vore interessante adun cui lengaçs dal epic folk, de cjançon di autôr, dal punk rock e dal metal core, e i Ostajki, formazion in balance tra folk, rock e psichedelie che e cjante par sloven. La serade e vignarà vuidade di Raffaele Serafini e di Serena Fogolini de ostarie letararie virtuâl Contecurte.

“O que arde”, il film par galizian che al à concuistât Cannes
La setemane che e ven si tornarà a tacâ cul cine, cu la proiezion, sabide ai 29 a nûf e un cuart di sere a Udin in Zardin Grant, te aree verde “Loris Fortuna” (in câs di ploie l’apontament al è li dal Visionario), di O que arde, il biel film par galizian di Oliver Laxe, che l’an passât al à vuadagnât diviers ricognossiments impuartantons, tacant dal premi de critiche inte sezion “Un certain regard” dal festival di Cannes.

Storie e leterature, memorie e atualitât
Al sarà spazi ancje pe leterature e pe storie. Sabide ai 29 a sîs e un cuart sot sere a Udin, lì de librarie Friuli, e sarà la prime presentazion in assolût intal Stât talian di Guillem, il libri de gjornaliste catalane Núria Cadenes che al conte la storie di Guillem Agulló i Salvador, zovin sportîf, militant antifassist e indipendentist, che al è stât sassinât di un trop di fassiscj ai 11 di Avrîl dal 1993 a Montanejos, tal Paîs Valenzian. Lunis ai 31 a vot e mieze di sere, a Murùs inte place dal Comun, il storic basc Joseba Asiron e il scritôr furlan Angelo Floramo a saran protagoniscj dal dialic in cuatri lenghis (furlan, basc, talian e spagnûl) dal titul “Conquista! Storiis resistentis tra Navare e Friûl”.

O ce biel cjistiel a Udin, o ce biel conciert di gale!
Par ce che al tocje la musiche, la serade che sù par jù e corispuint cun chês che vie pes edizions passadis di Suns Europe a vevin clamât dongje un public calorôs e numerôs li dal Teatri gnûf “Zuan di Udin”, si fasarà ai 30 di Avost intal plaçâl dal Cjistiel di Udin, là che si podarà gjoldi des esibizions de cjantante ladine Martina Iori cul so grup, de rapper basche La Basu, des rockers galesis Adwaith, dai sarts Bujumannu & Jumbo dal innomenât grup reggae Train To Roots e dal progjet furlan di esportazion di Laura Giavon & Drumlando. Presentadôr de serade il rapper furlan Doro Gjat.

In Setembar ancjemò musiche e leterature jenfri Friûl di Mieç, Cjargne e Gurizan
Suns Europe 2020 al larà dilunc ancje vie pal mês di Setembar cui concierts de catalane Joana Gomila a Lavarian sabide ai 5 e a Dartigne domenie ai 6 e dal basc Paxkal Irigoyen ai 12 a Puçui e ai 13 a Romans dal Lusinç e cul event speciâl dedicât ae Ocitanie, al Friûl e ae Europe che si fasarà a Trave sabide ai 19.

Informazions di servizi
Ducj i apontaments a son a jentrade libare e sore nuie, cu la ecezion de proiezion di O que arde, che e je a paiament. Pe serade di Suns Friûl, e pal conciert dai 30 di Avost in Cjistiel, par vê garantît il puest in sigurece e in salût, e covente fate la prenotazion midiant dal sît www.sunseurope.com, là che si cjatin ancjemò altris informazions in cont dal festival e dai siei protagoniscj, compagn che su Facebook.

1950-2020, i 70 agns des Lotis dal Cormôr. Storie e memorie vive, tiere, lavôr e identitât

Vuê al cole il setantesim inovâl dal inviament des Lotis dal Cormôr, il grant siopar par ledrôs che al inflamà la Vierte e l’Istât dal 1950 inte Basse Furlane.

In ocasion di cheste ricorence, di vuê fint a domenie, al è disponibil su AdessoCinema, la plateforme streaming curade di Visionario, Cinemazero e Cineteca del Friuli in colaborazion cu la Tucker Film, il documentari Lis Lotis dal Cormôr, che al conte chei fats e al met dongje lis vôs di diviers di lôr che a jerin implicâts in chê proteste: zornadis interiis di lavôr a gratis inte canalizazion dal Cormôr, propit cun chê di sburtâ il guvier talian a finanziâ chês oparis di bonifiche, a pro de ocupazion e de incressite de produtivitât agricule des tieris de Basse Furlane, e cul pericul continui di cjapalis de Celere.

La metude in rêt dal documentari e je dome che la prime di une schirie di iniziativis che a vignaran metudis adun vie pe seconde part dal 2020 propit cun chê di memoreâ chest aniversari “taront”. Un program di apontaments, jenfri art, musiche, comunicazion e aprofondiment storic e sociâl, coordenât de associazion Artetica e de Sezion ANPI Premoli, metût adun cu la colaborazion di diviers sogjets: ANPI Udin; CGIL Udin; cooperative Informazione Friulana / Radio Onde Furlane; Istitût Furlan pe Storie dal Moviment di Liberazion; CIRF e DIUM de Universitât dal Friûl; associazion KLARIS di Udin; Auser; Primacassa F-VG; Comuns di Cjarlins, Cjasteons di Strade, Çarvignan, Muçane, Palaçûl, Prissinins, Roncjis e San Zorç di Noiâr.

Al è une vore impuartant mantignî vive e cussiente la memorie di chê mobilitazion popolâr pal lavôr e pe dignitât, determinade e pacifiche, cundut de repression violente des autoritâts. Chê des Lotis dal Cormôr e je une des pagjinis plui interessantis e magari cussì no ancjetant pôc cognossudis de storie dal Nûfcent in Friûl.

Di une bande chê esperience, che e veve cjapât dentri su par jù vincjmil di lôr, e manten ancjemò in dì di vuê un puest impuartant inte memorie coletive e inte identitât de int de Basse Furlane. Di chê altre, però, chel ricuart e chê cussience a son lâts al mancul, un pôc par vie dal passâ dal timp e dal fat che tancj di lôr, implicâts personalmentri in chê mobilitazion, magari cussì no no son plui su cheste tiere, e un pôc par chê tindince ae dismentie che in Friûl e tocje cetantis vicendis e personis, che – cemût che o scrivevin cualchi an indaûr – a deventin “memorie platade” par vie di une operazion di rimozion coletive, dulà che no si pues fâ di mancul di vualmâ une vere strategjie di caratar ideologjic, stant che a son fats e sogjets che a mostrin un Friûl vêr, che al è diviers e alternatîf rispiet a cierts lûcs comuns.

Nus fâs plasê che in ocasion di chest inovâl si torni a fâ memorie vive des Lotis dal Cormôr. Par no dismenteâ e par tornâ a meti in comun chel patrimoni preseôs di valôrs, di solidarietât e di identitât che chês personis e chei fats nus àn lassât in ereditât e che nus coventin une vore ancje in dì di vuê.

Di Onde Furlane ai schermis piçui e grancj. Il percors tra Ream Unît e Friûl dal regjist Massimo Garlatti-Costa

Di “Slapagnot” a professionist dal audiovisîf; de radio al piçul e al grant schermi; dal Friûl al Ream Unît e po di gnûf in Patrie, passant par Milan. Al è il percors personâl, formatîf, artistic e professionâl fat fin cumò di Massimo Garlatti-Costa, senegjatôr, regjist e produtôr che di almancul doi decenis al è un dai nons di ponte de produzion audiovisive “made in Friûl”.
Cualchidun si vise ancjemò di cuant che inte suaze des inizitivis inmaneadis di Lidrîs e Butui pe Fieste de Patrie a Turin tal 2003, e jere stade fate la proiezion li dal Cinema Massimo dal so mockumentary Buris.

Tai ultins agns al à lavorât une vore sei tant che autôr e regjist che tant che produtôr, par esempli cu la serie televisive par furlan Suns Ator, cui documentaris Missus. L’ultima battaglia e Predis. La nazion dineade o inte edizion par furlan di cartons animâts forescj (di Omenuts a Tui e Tuie). Diviers dai siei lavôrs si cjatin ancje su internet, dai documentaris Fronte del Rock e Quando la terra chiama, disponibii su AdessoCinema, ai videos curts fats par Glesie Furlane: Udin – Coronavirus Lockdown, la istantanie in blanc e neri che e presente la poeticitât dramatiche de capitâl dal Friûl vueide e cidine des setemanis stadis, e Cetantis stelis, imni di umanitât e di sperance difondût in ocasion de Pasche.
O vin fat une tabaiade cun lui in cont de sô formazion e de sô ativitât.

Cemût si rivial a scrivi e a fâ video e cine, partint de radio e dai studis politics e sociâls?
«Al è stât naturâl. O ai scomençât a Onde Furlane passe trente agns indaûr cul grup dai “Slapagnots”. O jerin in cuatri – jo, Fabio Venuti, Roberto Copetti e Massimiliano Lancerotto – e o fasevin trasmissions cuntun tai ironic e satiric tant che “Sghiribicilu”. Cun chê stesse ande, che si ispirave ae comicitât dai Monty Python, o sin rivâts al video e duncje ae realizazion di “TeleFrico”.
Chê radiofoniche e je stade une esperience stimolante no dome par cetant che al inten a creativitât e comunicazion ma ancje cun riferiment al contest: l’ûs “normâl” de lenghe furlane, la atenzion viers dal pluralisim culturâl, de tutele des minorancis e dai dirits linguistics, une vision moderne e europeane di chestis cuistions. A son temis che o ai cjatât fûr e aprofondît ae universitât, a Siencis Politichis a Triest, intant dal Erasmus a Viene, cu la tesi di lauree su la minorance cravuate dal Burgenland e cognossint ancje altris realtâts di Europe».

A son stâts altris doi passaçs impuartantons: la scuele Ipotesi Cinema di Ermanno Olmi e lis esperiencis in Ingletiere e Gales. Ise vere?
«Sì, e je propit cussì. Dopo de lauree, frecuentâ chel cors e cognossi Olmi al è stât determinant. O ai imparât tantis robis e soredut o ai capît che o podevi fâ chest lavôr. Olmi di une bande al à mostrât preseament viers ce che o jeri daûr a fâ in chê volte e di chê altre mi à incoragjât in maniere implicite cul so esempli, che al mostre che si pues fâ un cine “vêr”, “uman” e “universâl” partint di une realtât specifiche, ancje se periferiche e margjinâl. Il pas seguitîf al è stât chel di cjapâ sù competencis tecnichis e soredut un metodi di lavôr: al è ce che o ai fat prime studiant a Sheffield par un Master in regjie e senegjature, e dopo lavorant a Cardiff, di freelance cu la BBC, e po ancjemò a Londre, ancje cu la Virgin».

Cuale ise stade la lezion plui impuartante de esperience britaniche?
«O ai imparât tantis robis, ma soredut che il prodot audiovisîf nol è “art” in tiermins astrats, ma al è il risultât di un procès struturât, cu la definizion di obietîfs, risorsis, mieçs, realizazion e distribuzion».

E in chel periodi il Friûl jerial lontan?
«O disarès di no. A Sheffield o ai presentât e fat ancje lavôrs par furlan. Cun di plui il Gales al à un rapuart cu la Ingletiere che al è sù par jù compagn di chel jenfri Friûl e Italie».

Cemût isal stât tornâ in Italie? E tornâ in Friûl?
«Dopo dîs agns di studi e di lavôr, mi soi cjatât a lavorâ di freelance a Milan intal cjamp de publicitât, che in tiermins tecnics e je “la art sublime”: une sintesi tra narazion e vision di fâ dentri di pôcs seconts. Par fâ l’autôr nol è avonde jessi autôr, al è miôr ocupâsi in maniere direte ancje de produzion. Cussì e je nassude Raja Films e o soi tornât in Friûl, di dulà che dispès mi môf par lavorâ ancje inaltrò e di dulà che ce che o produsìn al rive tes plateformis in rêt, par television, intai festivals e intes salis ator pal mont».

Publicitât, videos musicâi, documentaris, versions in furlan di seriis di animazion par fruts e finzion cuntune buine dose di comicitât, tant che intal câs di Buris. Ce tenial dongje prodots cussì diferents?
«E je une coerence di fonts, intal metodi e intai contignûts, leade ae mê personalitât, aes mês esperiencis, ai miei guscj e aes mês aspirazions. O cîr di meti in pratiche chel che o ai imparât e chel che o vuei fâ: meti dongje imagjins, sunôrs e peraulis par contâ storiis che a son intal stes timp particolârs e universâls; documentâ in maniere plui autentiche aspiets impuartants de storie dal Friûl e dal mont; promovi cu la pratiche la lenghe furlane; stiçâ intai spetatôrs curiositât e cussience. Cu la voie di imparâ e di capî e cence pierdi la voie di jessi ironics, là che al covente, daûr dai esemplis dai Monty Python e di Aki Kaurismaki».

Note: une version plui curte e par talian di chest articul e je saltade fûr domenie ai 3 di Mai sul Messaggero Veneto e si pues leile ancje in rêt.

Suns Europe, a Udin trê zornadis plenis di Suns e di Europe

suns-europe-011216

Une fiestonone di creativitât, di lenghis e di int. Ae fin di Suns Europe 2016 il belanç al è ancjemò plui positîf di chel de prime edizion dal an passât.
Il Festival european des arts tes lenghis minorizadis al manten ad in plen ce che si spietavisi e al mostre di jessi cressût ancjemò, massime in cont de cualitât des propuestis artistichis e de consistence dal public, che al à partecipât cun atenzion e cun curiositât ai diviers apontaments dal program de manifestazion.

suns-europe-ok

Dal 1n ai 3 di Dicembar Udin e il Friûl a son stâts il cûr de Europe de diversitât linguistiche. Cun Suns Europe il Teatri ‘Giovanni da Udine’ si à jemplât di musiche, peraulis e visions, tra proiezion di cines, concierts, incuintris, leturis di teatri, anteprimis e seradis speciâls. Tal foyer e te sale principâl dal “Teatron” al è stât un flus continui di propuestis di cjalâ, di scoltâ e di lei.

teatron

Il Festival al è stât ancje une vetrine europeane pe produzion ‘Made in Friûl’. La presentazion di ‘Kebar Krossé’, romanç afrofurlan e visionari di Stiefin Morat, la leture di teatri de prime conte lungje di Morat, ‘Donald dal Tiliment’, par cure di Teatro Sosta Urbana, lis anteprimis di ‘Friûl Revolution’ di Marco D’Agostini e I Cjastrons e di ‘Int/Art’ di Dorino Minigutti e Giorgio Cantoni e la gnove proiezion di ‘Brez Mej’, il documentari par sloven di Giovanni Chiarot, a àn dât al public di chenti e a chel forest une testemoneance clare e fuarte de vivarosetât, de varietât e de cualitât de produzion artistiche e culturâl dal Friûl.

veronika_usholik

Inte suaze di Suns Europe, vie pe buinore dai 3 di Dicembar, al è stât ancje un apontament (per)formatîf riservât a fantats des scuelis superiôrs – passe cuatricent di lôr – che a àn vût la pussibilitât di capî la impuartance de diversitât linguistiche e culturâl, tant che patrimoni, dirit e oportunitât, cul viodi e cul scoltâ uns pôcs dai protagoniscj de rassegne, dal rapper ‘cjargnel’ Doro Gjat ae cantante ‘čukčski’ Veronika Usholit e de band irlandese Imlé al scritôr e musicist catalan Xavi Sarrià.

caamagno

La serade finâl di sabide passade e je stade pardabon sflandorose. Dongje dai za ricuardâts Doro Gjat, Imlé e Veronika Usholik, a àn presentât lis lôr cjançons in concors il grup trip hop des isulis Faer Oer, Steso, la band galiziane Familia Caamagno, il rocker breton Brieg Guerveno, il performer siberian Gurude, il cornic Rory McGrath, la cjantautore frisone Norma e i Berdon, i cuatri fantats de Val di Fasse che a fasin hard rock. Il risultât al è stât une polifonie di lenghis, ritmis e stîi, un spetacul che si à zovât ancje de conduzion dai presentadôrs – la cubie furlane/slovene cun Renato Rinaldi e Karolina Cernic – e dal live painting di Cosimo Miorelli, autôr ancje de grafiche dal manifest di Suns Europe, che sul schermi daûr dal palc al à inricjît in tiermins visîfs dutis lis esibizions.

brieg_guerveno

Ae fin des cjançons, al public e ae jurie tecniche ur à tocjât il compit di decidi i vincidôrs dal concors musicâl. Par vie dal nivel une vore alt des propuestis, le àn vude avionde grivie. Ae fin la jurie dai esperts ur à dât il premi ai Steso, cul lôr trip hop inmagant, intant che il vôt popolâr al à premiât la vôs di aur di Veronika Usholik e ur à dât chei altris doi puescj a Gurude e ai Berdon.

sume

Cun di plui e je stade fate la premiazion ancje par chês altre sezions di Suns Europe: pal cine il ricognossiment al è lât al documentari groenlandês ‘Sume – Mumisitsinerup Nipaa’ di Inuk Silis Hoegh, che al conte cun snait la esperience de prime rock band in lenghe inuit, i Sume, leade cun chê des rivendicazions culturâls e politichis de int di chê grande isule, e pe leterature al è stât premiât Xavi Sarrià, pe sô ativitât di autôr in lenghe catalane.

sarria3

Inte suaze dai trê dîs di Suns Europe al è stât tocjât ancje un altri aspiet de creativitât, des identitâts e de diversitât tant che patrimoni, dirit e oportunitât, ven a dî chel de produzion agricole e enogastronomiche des minorancis e des nazions cence stât, in particolâr cun trê incuintris là che a son stâts metûts dongje il Friûl di lenghe furlane e slovene e il Piemont ocitan e francoprovençâl.

sunsdoc

Tal foyer dal «Teatron» vie par dute la durade de manifestazion si à podût cjalâ ancje la mostre Furlan Lenghe de Europe, prontade de bande de ARLeF (Agjenzie Regjonâl pe Lenghe Furlane).

Suns Europe al è stât metût adun cul coordenament di Radio Onde Furlane adun cu la cooperative Punto Zero e la associazion Il Laboratorio, cul jutori de ARLeF (Agjenzie Regjonâl pe Lenghe Furlane) e de Regjon e cu la colaborazion di une schirie di sogjets e istituzions dal Friûl e dal rest de continent.

rof_suns2016

Suns Europe, Udin si jemple di lenghis, visions, peraulis e creativitât

suns-europe

Cumò e je propit ore di Suns Europe. Udin e il Friûl a tornin a jessi il cûr de Europe «unide te diversitât» cu la seconde edizion dal Festival european des arts in lenghe minorizade, che al jere stât inmaneât pe prime volte un an indaûr. Vuê a cuatri e mieze dopo di misdì e sarà la scree uficiâl de seconde edizion de manifestazion, che par chest an di davuleç dute li dal Teatri ‘Giovanni da Udine’ de capitâl dal Friûl.
La manifestazion, metude adun cul jutori de ARLeF (Agjenzie Regjonâl pe Lenghe Furlane) e de Regjon, cul coordenament di Radio Onde Furlane adun cu la cooperative Punto Zero e la associazion Il Laboratorio e cu la colaborazion di une schirie di sogjets e istituzions dal Friûl e dal rest de continent, e darà spazi a diviersis espressions creativis tes lenghis des minorancis e des nazions cence stât: la musiche, la scriture, tra poesie, narative e teatri, e la produzion audiovisive, tra cine, tv e web, oparis di finzion e documentaris.

familia-caamagno_foto-2


Musiche, leterature e produzion audiovisive

Chel che lu clamin «il Teatron» par trê dîs si jemplarà di musichis, di imagjins, di peraulis, di lenghis, di identitâts e di creativitât. In struc: si jemplarà di Suns e di Europe, di Suns Europe!

Par ce che al tocje la musiche, si va di Veronika Usholik, cjantante che e rive de lontane Chucokta (Russie), al progjet di rock par breton firmât di Brieg Guerveno e dai Steso che tes isulis Faer Oer a produsin un trip pop eletronic inmagant ai galizians Familia Caamagno, cuintet che al messede rock, pop, beat e r’n’b. E ancjemò dai rappers irlandês Imlé ae cjantante frisone Norma e dal cjantautôr de Cornualie Rory McGrath al performer de Hacassie (Russie) Gurude. Cun lôr, te serade finâl dai 3 di Dicembar a saran ancje il rapper cjargnel Doro Gjat e il grup grunge-hardrock ladin Berdon, che a son stât selezionâts dentri di Suns Ladinia, il festival de cjançon in lenghe minoritarie de Europe alpine e mediteranie, che si à davuelt ai 19 di Novembar a Moena, in Val di Fasse.

doro_gjat

Cun di plui sarà – par esempli – la ocasion par cognossi di dongje Xavi Sarrià, scritôr e musicist di Valencia, autôr di doi romançs e vôs e ghitare dai Obrint Pas, un dai grups miôr dai Paîs Catalans, protagonist di un incuintri/interviste sabide ai 3 di Dicembar a tacâ di siet sot sere. Un altri dai apontaments de sezion leterarie al è chel cul innomenât esploradôr di memorie e culture Alessandro Portelli, che al vinars ai 2 a 6 e mieze sot sere al presentarà il so gnûf progjet Crossroads.

xavi-sarria

Al è une vore siôr e svariât ancje il cartelon de sezion dedicade ae produzion audiovisive, cun cines par gaelic, par sart, par sami, par euskera e par inuit: dal curtmetraç irlandês ‘Rúbái’ al mockumentari ‘Sos Mortos de Alos’, fintremai ae comedie basche ‘Amona Putz!’ e al documentari groenlandês ‘Sumé – Mumisitsinerup Nipaa’.

Tra i events speciâi al è ancje un incuintri cui zovins des scuelis dal teritori che a podaran cjapâ cussience di cemût che la diversitât linguistiche e culturâl e je un patrimoni, un dirit e une oportunitât par ducj.

sume


Une vetrine europeane pe produzion ‘Made in Friûl’

Suns Europe al è ancje une ocasion pe nestre comunitât par mostrâ la sô muse, la sô lenghe e la sô produzion culturâl plui gnove e plui interessante. Dongje di Doro Gjat te sezion musicâl, a son altris espressions creativis de leterature e dal cine par furlan.

stiefin-morat

Vuê e sarà la presentazion dal gnûf libri di Stiefin Morat. Publicât di KappaVu, il so titul al è ‘Kebar Krossé’ e al è un romanç afro/furlan: cui che al à za let alc di chel test al dîs che al è il degn erêt di ‘Donald dal Tiliment’. Propit lis aventuris di Pidin e Saco, i protagoniscj sfolmenâts di chel libri saltât fûr tal 2000, a saran il cûr di une leture seniche furlane, babeliche e trastolone par cure di Teatro Sosta Urbana che si fasarà usgnot a 9 mancul un cuart.

friul-revolution-2

Une altre anteprime furlane e je chê di ‘Friûl Revolution’ (doman a chê stesse ore), la serie produsude pe television de bande dai Cjastrons e di Marco D’Agostini, che e conte in maniere comiche e sureâl il Friûl rivoluzionari che al è e che al sarà. Il Friûl furlan al sarà sul schermi ancjemò cuntune altre novitât: il prin episiodi di ‘Int/Art’, il documentari di Dorino Minigutti e Giorgio Cantoni che al conte i creatîfs di chenti «under 35».

Te sezion dedicade ae produzion audiovisive al sarà spazi ancje pal Friûl di lenghe slovene, cul cine di Giovanni Chiariot ‘Brez Mej’.
Tal foyer dal «Teatron» vie par dute la durade dal festival e sarà ancje la mostre Furlan Lenghe de Europe.

Dutis lis informazions su Suns Europe si cjatin in rêt: www.sunseurope.com e www.facebook.com/SunsEuropeFestival/.

banner-arlef-bruxelles

‘I ricordi del fiume’ al rive tai cines, doman la anteprime alì dal Massimo a Turin

fiume

I ricordi del fiume al rive tes salis a tacâ di doman, ai 21 di Avrîl. Il film plui resint dai regjiscj turinês Gianluca e Massimiliano De Serio, che al jere stât presentât cun sucès a Vignesie te edizion dal an passât de Mostre internazionâl de art cinematografiche e che al à cjapât diviers ricognossiments ator, al jentre te programazion di diviers cines dal Stât talian tra cheste setemane e la prossime.

La anteprime uficiâl e je chê che si fâs a Turin alì de sale un dal Cinema Massimo, cu la presince dai doi autôrs.
L’apontament al è a vot e mieze, cemût che al ven sclarît culì.

fiume_deserios

I ricordi del fiume al conte la storie dal Platz, chê baracopoli grandonone che si cjatave a nord di Turin, dongje dal flum Stura.
Il film al conte in particolâr i ultins mês de esistence dal cjamp e duncje al da cont de sô int, cu lis sôs storiis, cui siei problemis, cu lis sôs sperancis. Un documentari fat cun snait, cun umanitât e cence retoriche.

I ricordi del fiume al sarà in programazion alì dal Massimo fintremai ai 27 di Avrîl.
Sù par jù in chei stes dîs si podarà viodilu ancje inaltrò, a tacâ di Rome e di Milan.

TFF, Truzzi Broders e Maurizio Mattiuzza. Cine, musiche e poesie a Turin

A4_orizzontale.indd

Di un festival a di chel altri. La setemane passade a Udin al è stât Suns, il Festival de cjançon in lenghe minoritarie de Europe alpine e mediteranie, intant che vuê e tache a Turin la edizion numar 32 dal Torino Film Festival.
La rassegne cinematografiche internazionâl che si davuelç in citât al è zaromai di atnt timp un apontament classic cul cine di cualitât che al rive di ogni bande dal mont. Il program al è sior di titui, di proiezions e di events e si pues discuvierzilu achì.

maurizi

Doman, invezit, si fasarà a Turin la cerimonie di consegne dai premis Mario Soldati  . L’apontament al è a 4 e un cuart dopo di misdì alì dal Collegio San Giuseppe, in vie Andrea Doria 18.
Tra i finaliscj dal innomenât concors inmaneât de bande dal  Centro Pannunzio al è ancje un dai scritôrs e dai poetis miôr dal Friûl, che  ogni trop al passe di chestis bandis, par solit par cjapâ un premi. Al è Maurizi Mattiuzza, che dopo jessi stât alì dal Salon dal libri par ritirâ il prin premi dal InediTo – Colline di Torino  tal mês di Mai di chest an, cumò al cjaparà il tierç premi dal Soldati simpri cu la ricuelte di poesiis “La Donna del Chiosco sul Po”, che e vignarà publicade tal 2015.
Chest viaç il passaç par Turin di Mattiuzza al sarà une vore svelt, stant che domenie al sarà a Cividât, alì dal teatri Ristori a 6 sot sere, par un incuintri cul public coordenât dal gjornalis e poete Michele Obit.

truzzib

Domenie a Turin al è un altri apontament di no pierdi. Za di cualchi mês a àn tornât a sunâ ator i Truzzi Broders , storiche band di chenti, une vore ative soredut tra i agns Otante e Novante.
Par motîfs anagrafics e par menâsi un pôc pal boro, chest tornâ a sunâ dal vîf lu àn clamât Geriatric Tour. Passant doman, a dîs di sere, a saran alì dal Caffè del progresso, in cors San Maurizio 69.
«…e questa è una canzone senza finale…» .

Cine mût, bicicletis e Cormôr Salvadi

Layout 1

Sabide ai 5 di Otubar si scree la edizion numar 32 dal Festival dal Cine Mût di Pordenon, event di innomine planetarie che al va indenant fintremai ai 12 di Otubar cun proiezions, incuintris e altris iniziativis. La edizion di chest an des ‘Zornadis’ e je sot dal segn di Orson Welles, stant che une des pontis dal so cartelon e je la proiezion di ‘Too Much Johnson’, il so film dal 1938 che si lu pensave pierdût e che invezit a àn tornât a cjatâlu.
Tra i events speciâi a son la viertidure cul film mût contemporanei spagnûl ‘Blancanieves’ e la dople proiezion finâl di ‘The Freshman’, cun Harold Lloyd tant che protagonist, che al vignarà compagnât de musiche dal vîf de ‘FVG Mitteleuropa Orchestra’. Tra lis sezions specifichis a son chês dedicadis al cine di animazion, ae Svezie, al Messic e ae Ucraine.

1_Cormor2013

Tra i apontaments interessants par cui che si cjate in Friûl in chescj dîs a son ancje i events dal program di Cormôr Salvadi, rassegne dedicade ae creativitât, ae musiche e ae produzion culturâl dal Friûl di vuê. La manifestazion e je za tacade la setemane stade, cun dôs seradis dedicadis ae musiche reggae e dub. Ai 4 e ai 5 di Otubar al sarà protagonist il rock: chel sunât di Prehistoric Pigs e Jimmy Barbiani Band la Sabide di sere sot dal tendon de aree demaniâl di Cjasielis e chel rapresentât tes cuviertinis dai discs, cu la mostre “La Storia del Rock in 200 copertine”, par cure di Angelo Tomasin, che e ven screade Vinars a 8 e mieze li de Vile Di Varmo, in Vie Cavour, a Mortean.
La setemane che e ven a Cjasielis ai 12 di Otubar tal dopodismidì formazion musicâl cul percussionist Luca Colussi e la sere conciert cul stes Colussi adun cul innomenât pianist Glauco Venier e cun Alessandro Turchet al liron, intant che domenie ai 13 a Mortean si fasarà la Fiere dal Disc li de palestre comunâl di Vie Leonardo da Vinci.

luna-e-un-quarto

Cun di plui, ai 4 di Otubar, a tacâ di 8 e mieze di sere, a Privan di Bagnarie, li de tignude Beltrame, la atore Stefania Carlotta Del Bianco, il poete Maurizio Mattiuzza e la band dai Luna e Un Quarto a presentin ‘Con tutta la ruota davanti’, un recital di peraulis e musiche dedicât ae bicicletes e al cilcisim. Un viaç emotîf, une pedalade imagjinarie, une corse su lis stradis dal mont e su chês dal Tour, de Paris-Roubaix, de Vuelta e dal Zîr di Italie, là che si incrosin storiis di bicicletis tant che mieç di traspuart, imprest di lavôr e strument par discuvierzi, par pierdisi e par cjatâsi. Par savênt di plui: parcoextiro@gmail e eventi.krea@gmail.com.