Suns Europe + Malasorti + Ataque Escampe + Peppa Marriti Band + Mauro Punteri + Kraški Ovčarji = Babêl Europe 19/2019

Un altri viaç a torzeon jenfri musichis, lenghis, minorancis e nazions cence stât. Al è ce che e promet la gnove pontade di Babêl Europe, il program cuindisinâl dedicât ae produzion musicâl intes lenghis minorizadis de Europe che al cjate spazi inte programazion di Radio Onde Furlane il martars a undis a buinore e po, in repliche, tal dopo di misdì di miercus a une dopo e di sabide a une e mieze.

Si fevelarà di storie e di atualitât, di produzions musicâls gnovis e dal passât e di musiche babeliche di esportazion, ator pe Europe ma ancje inaltrò, ancje daûr di percors migratoris vecjos e gnûfs. Cun di plui si vierzarà un altri barcon in anteprime su la edizion 2019 di Suns Europe, il festival des arts tes lenghis minorizadis dal nestri continent che si davuelzarà in Friûl ae fin di Novembar e ai prins di Dicembar.

E sarà la ocasion par scoltâ une cerce di Per amore per odio o un ideale, concept album plurilengâl dal gurizan Mauro Punteri, che al recupare memoriis partigjanis e al conte resistencis di îr e di vuê, e par recuperâ alc dal repertori de Peppa Marriti Band, par sigûr la espression musicâl contemporanie des minorancis albanesis de Basse Italie plui cognossude e plui innomenande, che vie pai dîs passâts e jere impegnade in conciert intai Stât Unîts di Americhe, e dai cjarsulins Kraški Ovčarji, formazion che za di agns e fâs musiche cjantant par sloven.
Lis anticipazions di Suns Europe a parmetaran di scoltâ i galizians Ataque Escampe e i sarts Malasorti

Babêl Europe si pues scoltâle su lis frecuencis di Radio Onde Furlane (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu). Dopo des sôs trê emissions vie pe setemane (vuê in direte, doman e sabide in repliche), ancje cheste gnove pontade si pues tornâ a scoltâle in rêt su Spreaker e su Spotify.