Zornade Europeane des lenghis, a Turin in Universitât e in Friûl in place e par radio

Vuê o sin ai 26 di Setembar e a tacâ dal 2001 cheste e je la Zornade Europeane des Lenghis.

E je une Zornade impuartante che o memoreìn simpri cun plasê.

Ancje chest an, vie pe zornade di vuê e dilunc di cheste setemane, par cheste ricorence dedicade al pluralisim linguistic tant che ricjece, dirit e oportunitât a vegni inmaneadis diviersis iniziativis in dute Europe.

Ancje chest an incuintris, events e apontaments a vegnin inmaneâts a Turin e in Friûl.

Tra chescj o segnalìn l’event metût adun dal Centri Linguistic de Universitât di Turin juste te zornade di vuê: une iniziative dedicade soredut ai students e che e ponte la sô atenzion viers un aspiet dal plurlinguisim, chel che al tocje l’insegnament, l’aprendiment e la cognossince des lenghis che, in Europe e pal Mont, si cjatin in cundizion di dominance, a nivel statâl e in cualchi câs ancje intune dimension internazionâl.

La Zornade Europeane des Lenghis, però, e je la Zornade di dutis lis lenghis e duncje anche di chês che si cjatin in cundizion di minorizazion.

Cun chê di promovi il plurilinguisim in dutis lis sôs dimensions a tacâ des lenghis minorizadis dal teritori, ancje chest an la Zornade Europeane des Lenghis e ven memoreade ator pal Friûl.

A Udin, par esempli, la ARLeF (Agjenzie Regjonâl pe Lenghe Furlane) e inmanee un pont informatîf in place, vie pe zornade di vuê di 10 a buinore a 6 sot sere, devant dal Palaç comunâl, in vie Lionello, cuntun stand e cu la presince di volontaris che a daran fûr, a gratis, materiâl promozionâi e di informazion.

Simpri vuê, a une e mieze dopo di misdì, la Zornade Europeane des Lenghis e ven memoreade su Radio Onde Furlane cuntune trasmission speciâl.

Ancje pal 2018 il nestri auguri, compagn che agns indaûr, al è chel:
Buine Zornade Europeane des Lenghis a dutis e a ducj!

Udinese – Torino 1-1

Udin e Turin a spartissin goi, ponts e displasês. La partide di îr ur permet a dutis dôs lis scuadris di puartâ a cjase un pontut e duncje di contentâsi, tignint bot a metât classifiche, e in chel istès di no contentâsi par nuie.
Chest al vâl pal Udin, par vie che il gol segnât tal prin timp di De Paul al da la impression che cui granatas al puedi fâ compagn che cu la Sampdoria, e salacor al vâl ancjemò di plui pal Turin, che vie par dute la partide al prodûs plui azions ofensivis dai blancs e neris e al à ancje cualchi reson par inrabiâsi par vie di un pâr di decisions dal arbitri Valeri.

La scuadre di balon furlane si presente sul cjamp dal Stadi Friûl cun Scuffet in puarte, cu la difese a cuarti cun Styger Larsen, Ekong, Nuytinck e Samir, cun Mandragora, Berhami e Fofana tal mieç, cun De Paul e Pussetto laterâi e cun Lasagna uniche ponte. Il Toro al rispuint cuntun 3-4-2-1, là che a cjatin puest zuiadôrs innomenâts tant che il puartîr Sirigu, il difensôr Nkoulou e l’atacant Belotti.

I ospits a mostrin daurman di vê plui determinazion e plui fuarce in atac, cun Berenguer, cun Belotti e cun Iago Falque, che però dopo nancje vincj minûts al scuen lâ fûr par infortuni e i lasse il puest a Zaza. Dopo undis minûts di zûc Bereguer al tire in puarte e al segne, ma Valeri ancjemò prime dal tîr al calcole la sô posizion iregolâr e al sivile e duncje il gol nol ven convalidât.
Se si gjave vie la conclusion dal ex zuaidôr dal Osasuna e lis discussions su la valutazion dal arbitri, il Turin al masane plui zûc e al ten di plui la bale, ma nol rive a jessi pardabon pericolôs des bandis di Scuffet. L’Udin no si scompon, al va dilunc cu lis sôs ripartencis e cussì e rive a cjatâ il gol cuntun tîr di De Paul, che si zove ancje di une deviazion di Nkouku, dentri de prime mieze ore di zûc.

Il prin timp si siere cul Udin in vantaç e cui ospits maluseriôs no dome pe mancjade convalide dal gol di Bereguer e ma ancje par un contat suspiet tra Fofana e Meité che al varès inviât la azion dal gol dal blanc e neri argjentin.
La seconde frazion si vierç ancjemò i ospits che a son ben proietâts indenant. Al rive cussì il golon di Meité, che cuntun biel tîr, potent e precîs, al mande la bale juste tal cjanton tra travierse e pâl a man drete di Scuffet. E rive ancje la variazion tatiche di mister Velazquez che al cambie Pussetto cun Teodorczyk cun chê di dâi plui pês al atac.

Cundut dai mudaments tatics, la cjançon de partide e reste sù par jù simpri chê, cul Toro che al manovre cun plui continuitât cence però jessi masse incisîf in zone tîr e cul Udin che al prove a rispuindi cun verticalizazions in velocitât.
I ospits a protestin ancjemò par un altri contat suspiet tra Samir e Belotti che nol ven sanzionât in nissune maniere di Valeri, intant che i blancs e neris a provin ancjemò a colpî in cuintripît.

La pression granata e prodûs cualchi scat di Belotti e Zaza, che però a vegnin tignûts sot voli de difese blancje e nere. Lis rispuestis dal Udin a metin Lasagna e Teodorczyk tes cundizions di tirâ in puarte, ancje se nissun dai doi al rive a fâ rindi inte maniere miôr chês buinis ocasions. Al fâs compagn ancje Machis che juste ae fin de partide si cjate di bessôl denant di Sirigu ma al controle malamentri e al bruse une bale di aur.

Chel mangjât di Machis al podeve jessi il gol de vitorie dal Udin. Al sarès stât un sucès pesant e impuartant, ma nol sarès stât just pal Turin, massime pe cuantitât e pe cualitât dal zûc imbastît de scuadre granata.
Al Udin i restin la sodisfazion pe buine tignude de difese e pal mantigniment de imbatibilitât e la necessitât di dâi plui fuarce e al atac, là che dongje des buinis prestazions di De Paul e va dilunc il moment no di Lasagna.

Domenie che e ven i blancs e neris a zuiaran a Verone cuintri dal Chievo.

Gnovis produzions de Sardegne ai Grisons + events + migrazions + Suns Europe 2018 =  Babêl Europe 15/2018

Al è martars ai 24 di Lui e tal palinsest di Radio Onde Furlane a undis a buinore al torne Babêl Europe, il program cuindisinâl dedicât a lenghis, musichis, minorancis e nazions cence stât.

Te pontade numar 15 dal 2018, che si podarà tornâ a scoltâle in repliche ancje doman, miercus ai 25 di Lui, a une dopo di misdì e po ancjemò sabide ai 28, a une e mieze dopo di misdì, e sarà la pussibilitât di fâ un altri viaç ator pe Europe de diversitât linguistiche e de creativitât musicâl.

In particolâr il percors babelic di Onde Furlane si disviluparà tra gnovis produzions, cualchi salt indaûr tal timp, segnalazions in cont di events e manifestazions e Europe…fûr de Europe.

E sarà la ocasion par scoltâ une cerce dal disc gnûf dal cjantautôr rumanç Pascal Gamboni, Da Mai Se, e par gjoldi de gnove produzion dai sarts Dr. Drer e CRC Posse, Eja, che sù par jù trê setemanis indaûr e je saltade fûr compagnade di un video par cure di Enrico Madau, che si cjate su YouTube.

Dongje des novitâts che a rivin dai Grisons e de Sardegne, Babêl Europe si indreçarà ancje viers de Galizie, par tornâ a cjatâ il grup di Alonso Caxade, e tes monts dal Piemont, scjavaçant lis Valadis ocitanis e chês di lenghe francoprovençâl, di dulà che a rivin i Blu l’Azard, che joibe ai 26 di Lui a screin la edizion 2018 dal festival Alta Felicità a Venaus tal Cjanâl di Susa.

Cun di plui il viaç babelic di cheste setemane al rivarà fintremai in Argjentine, là che al cjatarà il cjantautôr e ghitaris di divignince galese Renè Griffiths.
Vie pes pontadis seguitivis di Babêl Europe la trasmission e larà dilunc a dedicâ spazis ae produzions musicâls tes lenghis minorizadis dal continent che a son leadis aes esperiencis de emigrazion.

Inte pontade numar 15 dal 2018 di Babêl Europe si fevelarà di concierts e di manifestazion e si ricuardarà il svincinâsi de scjadince dal bant pal concors de sezion musicâl de edizion di chest an dal festival european des arts tes lenghis minorizadis Suns Europe.

Radio Onde Furlane si le scolte sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu.

In Friûl e a Turin si fevele di Europe, par radio e tes Universitâts

Altiero Spinelli al scriveve che la Europe no cole dal cîl, ma si le fâs sù ogni dì, cun fature, cun determinazion e cun snait.

Che il procès di integrazion europeane al sedi un percors dûr, faturôs e plen di problemis e dificoltâts al salte fûr une vore a clâr massime in chescj ultins timps, cuant che al è lât al mancul chel ‘euro-otimisim’ che al jere une vore pandût dome un pôcs di agns indaûr.

In chel istès si viôt a clâr che al covente fâ sù une Union Europeane che e sedi plui Union e plui Europeane e mancul dipendente dai stâts nazionâi, de lôr autoreferenzialitât ‘ontologjiche’, de lôr crisi e dal lôr nazionalisim plui o mancul fanatic e infogât.

Lis ocasions par resonâi parsore e ancjemò prime par cognossi e par capî alc di plui su cheste cuistion, che no si pues frontâle su la fonde di prejudizis e di lûcs comuns (ni a pro, ni cuintri), no mancjin.
In particolâr o vin plasê di segnalâ dôs iniziativis che a somein interessantis: une a Turin, propit vuê ai 13 di Otubar, e une in Friûl, che si scree doman ai 14 di Otubar e che e larà dilunc fintremai ai 3 di Novembar.

Il prin apontament al è chel di vuê, a tacâ di 2 e mieze dopo di misdì, li de Aula Magna dal Campus Einaudi de Universitât di Turin, là che la Sezion europeane ‘G. Merlini’ de biblioteche ‘N. Bobbio’ e inmanee une cunvigne dedicade ai contignûts de Relazion finâl dal Comitât di Savints istituît de bande de presidente de Cjamare dai deputâts, Laura Boldrini, cun chê di fâ il pont su la situazion e su lis prospetivis de Union Europeane.

L’incuintri, che il so program si pues leilu culì, al ven inmaneât ancje cu la colaborazion dal IUSE e dal Centro Studi sul Federalismo di Moncalieri e cul jutori de Compagnia di San Paolo.

Doman, invezit, si scree Europa 57/17, un progjet metût adun de bande dal Centri di documentazion europeane ‘G. Comessatti’ de Universitât dal Friûl e de cooperative Informazione Friulana cul jutori de Rapresentance in Italie de Comission Europeane.

La iniziative, che si insuaze tal progjet di rêt 60 anni di Unione europea: sfide e prospettive per l’Europa, e à chê di memoreâ il 60esim inovâl dai Tratâts di Rome, di fâ cognossi il procès di integrazion europeane e lis istituzions de UE e di promovi cussì une citadinance europeane cussiente.

Cun chescj intindiments, Europa 57/17 al met dongje une taule taronde, che si fasarà a Udin ai 3 di Novembar, e une serie di trasmissions radiofonichis, che si podarà scoltâlis su lis frecuencis analogjichis (90 Mhz pe plui part dal Friûl, 90.2 Mhz in Cjargne) e sul sît internet (www.ondefurlane.eu) di Radio Onde Furlane, la sabide a 8.30 a buinore, la domenie a 10.30 a matine e la joibe a 5 sot sere.

La prime pontade e je proviodude juste par doman.

Informazions plui in detai in cont dal program radio e di dute la iniziative si cjatin achì, achì e achì.

Mostre dal Cine di Vignesie, ocasions di ‘LeB Pride’ e di braùre furlane

Si svicine la conclusion de edizion numar 74 de Mostre dal Cine di Vignesie, che par sigûr e je une des manifestazions plui innomenadis e plui impuartantis a nivel planetari par ce che al tocje la art cinematografiche.

La Mostre e je in chel istès un event culturâl, di costum e mediatic, tra produzion cinematografiche maistream e inovative, mondanitât, storie dal cine, marketing e iniziativis di ogni sorte.

Chest an, salacor ancjemò di plui che agns indaûr, il festival al à mostrât ancjemò di plui dutis chestis musis diferentis, in particolâr cu la partecipazion significative dal cine american.

A son ancje tancj altris aspiets che a segnin la edizion 2017 de Mostre. Tra chescj si pues menzonâ ancje alc di furlan e che nus tocje di dongje, in cualchi maniere, tant che associazion.

Al è il câs, par esempli, de cussì clamade sigle di cuviertine de manifestazion, che par chest an e je stade prontade di un creatîf furlan une vore cognossût, Tomas Uolli Marcuzzi, cemût che al ven contât achì.

Cun di plui, cuntune braùre e une partecipazion particolârs, nus fâs plasê ricuardâ che sul tapêt ros dal Lido di Vignesie al è passât ancje un dai fondadôrs de associazion Lidrîs e Butui, ven a dî chel che uns pôcs in agns incà, stant che al vîf tai Stâts Unîts, lu calcolìn il nestri «amì american».
O fevelìn di Piero Basso, diretôr de fotografie di Una famiglia, il film di Sebastiano Riso che al è tra chei in concors a Vignesie e che al jentrarà e programazion dai cines ator pal Stât talian a tacâ dai 28 di Setembar.

O sin contetons par lui.

A Turin Blackout in fieste, in Friûl Onde Furlane a monteâ. Radio Days… and Nights

Chi di cualchi mês al cole in maniere uficiâl il vincjesim cuint inovâl di Radio Blackout, la storiche emitente alternative e antagoniste di Turin, che si scolte sui 105.250 Mhz e in rêt.
Cundut achel la ricorence e ven memoreade daurman, di vuê a domenie ai 11 di Jugn, li dal Spazio 211 in vie Cigna, cu la gnove edizion dal Blackout Fest, che par solit si fâs tra la fin dal mês di Mai e la prime metât di Jugn.

Il program complet al met dongje trê dîs pençs di concierts e di altris events, a tacâ za tal dopodimisdì.
Une manifestazion di no pierdi, par plui resons.

A proposit di radios, se si spostisi di Turin al Friûl, al merete segnalât l’apontament di doman, sabide ai 10 di Jugn, su Radio Onde Furlane. Te trasmission di aprofondiment gjornalistic Dret & Ledrôs, curade e condusude dal diretôr de emitente, Mauro Missana, si fevelarà di mont, di malghis, di prodots tipics, di aghe e di energje, cuntune schirie di ospits cualificâts.

Pe ocasion la radio libare dai furlans e larà a monteâ in Cjargne, cun doi colegaments in direte dal Çoncolan intant che il malgâr Michele Gortani al mene fin a Malghe Pozof lis sôs vacjis bisis, inte suaze di chel che al è deventât un event, il Transumanza Day. Cun di plui, si fevelarà ancje de fieste Make Frico not War di Tramonç di Sot.

Onde Furlane si pues scoltâle ancje in rêt e cu la App, che si pues discjamâle a gratis.

Par dîle cul titul di un cine di Woody Allen: a son Radio Days… and Nights.

Musiche babeliche di balâ e di scoltâ. Usgnot a Turin e doman a Udin

Doi apontaments di no pierdi cu la musiche babeliche di scoltâ e di balâ, tra usgnot e doman.

Il prin al è a Turin, li dal Centri sociâl Askatasuna (cors Regina Margherita 47), là che usgnot – orari uficiâl a 11 – al è proviodût il conciert di Gran Bal Dub, il progjet metût adun di Sergio Berardo (vôs, ghironde e milante altris struments tai Lou Dalfin e in altris progjets di musiche ocitane) e Madaski, innomenât produtôr e musicist, cu la colaborazion di Chiara Cesano al violin e di Roby Avena ae armoniche e al semiton. Ritmis e musichis “d’oc” cuinçadis in salse gjamaicane e eletroniche.

Il secont al doman a Udin, li dal Bar dal Visionario (vie Asquini 33), za a tacâ di 8 e mieze di gnot.
L’apontament si clame Une Patrie che e cjante. Peraulis e musichis de Cjargne ae Basse e al cjape dentri la esibizion di trê nons impuartant de cjançon furlane contemporanie, inte suaze di Friûl Patrie di Ducj, il program des iniziativis inmaneadis cul coordenament di Furlan in Comun, il Sportel pe lenghe furlane dal Comun di Udin, par memoreâ la Fieste de Patrie dal Friûl.

I protagoniscj de serade, lant daûr di un percors artistic e gjeografic che al va des monts ae marine, a son il zovin cjantautôr cjargnel Alvise Nodale, che sù par jù un an indaûr al veve dât fûr il so prin disc, Conte Flame, la cubie dai Rive No Tocje, che a messedin rock, blues e tescj ruspiôs e visonaris di ispirazion ‘trastolone’, cemût che al mostre in maniere interessante il lôr secont disc Lis conseguenzis dal deliri, e Silvia Michelotti, cjantautore di Udin, che e torne pe ocasion in sene, dopo une polse di uns pôcs di agns, autore une desene di agns indaûr di albums interessants tant che Sono lagrimis o stelis? e Alis.

O di ca o di là si scugne lâ. Par balâ o par scoltâ.

Torino – Udinese 2-2

Moments di gjonde e di delusion, colps di sfighe o di fortune, snait blanc e neri e cûr ‘granata’. Cuntune prime mieze ore avonde flape e chê altre ore plene di emozions, la partide tra Toro e Udin e finìs doi a doi: une paritât che in cierts moments ur va strente a dutis dôs lis scuadris e che però, propit par chel, ae fin e je chê juste.

L’Udin a Turin si presente cun cualchi novitât: al è ancjemò Scuffet in puarte cun Angella in difese adun cun Danilo, Widmer e Samir, cun Kums, Badu e Jankto te seconde linie e cun Zapata, De Paul e Perica in atac. Il Toro al rispuint in maniere avonde speculâr: Hart tra i pâi, difese a cuatri cun Zappacosta, Rossettini, Moretti e Molinaro, mediane cun Acquah, Lukic e Baselli e prime linie cun Iago Falque, Belotti e Ljajic.

I blancs e neris si mostrin ecuilibrâts e in stât di jessi pericolôs. Dopo cinc minûts di zûc si met in mostre Perica, che al vuadagne une punizion, tirade di De Paul su la bariere. Cualchi minût plui indenant e rive di une bale ferme ancje la prime ocasion dal Turin: cross par Rossettini, che le tocje cul cjâf ma le mande fûr bersai. Altris tentatîfs ju fasin Perica e Bellotti, ma il risultât al reste chel.

Il timp al passe e Toro e Udin a tegnin bot un cun chel altri: Zapata, Perica e De Paul si movin ben in orizontâl e in verticâl e a judin ancje indaûr, intant che di chê altre bande i parons di cjase a sburtin cul dinamisim di Belotti e cu la energjie gnove zontade de jentrade di Iturbe. Si zuie, si va al atac e si difindisi, di une bande e di chê altre, però la ande de partide no somee jessi alc e ce, stant che dopo i prins tentatîfs a mancjin dal dut lis conclusions in puarte.

Dome tai ultins dîs minûts al rive il svolt. A son lis azions in cuintripît dal Udin che a produsin une conclusion cul cjâf di Zapata, parade di Hart, un tîf fûr bersai di Jankto e une combinazion Perica-Zapata cul colombian che nol cjate la puarte. E a son lis conclusions dal Toro juste prime de polse: doi corners di Zappacosta e tîrs di Belotti e Rossettini, che a cjapin il prin la travierse e il secont il pâl, cun Scuffet che al met un blec suntun altri tentatîf di Moretti.

Il puartîr furlan si fâs cjatâ tal puest just tal moment just ancje sul imprin dal secont timp, cuntun biel intervent suntun tîr di Acquah. Al è il segnâl che l’Udin al pues provâ a cirî daurman il gol e cussì tal zîr di pôcs minûts Jankto al profite di un erôr di Rossettini, al frache sul aceleratôr e al fâs partî une bombe che e cjate spazi te puarte di Hart.

Mihajlovic al decît di rinfuartî daurman la trazion ofensive de sô scuadre. A jentrin Boyé par Lukic e plui indenant ancje Maxi Lopez al puest Baselli, ma il Toro cun cuatri pontis nol rive a ribaltâ la situazion. Delneri al rinfuartìs la difese, cun Heurteaux al puest di De Paul, e l’Udin si siere indaûr e al torne al atac cun chê di disfrutâ i sbilançaments dai aversaris. Al è ce che al sucêt cuant che Badu i robe la bale a Boyé e al mande lunc in profonditât Zapata, il colombian al tire in diagonâl, la difese dal Toro e je fûr scuare e Perica al rive di bessôl denant de puarte e al tocje la bale che e finìs dilà de rie.

Il cûr ‘granata’ al ven fûr ad in plen in cheste ultime part de partide. Doi minûts dopo dal gol dal atacant cravuat al rive il gol di Moretti, che par segnâ si zove di une deviazion di Samir suntun tîr di Iturbe, tal ultin cuart di ore prime al segne ae sô maniere ‘il Gjal’ Belotti e po si svicine al ribalton complet Ljiaic, che però al cjate la puarte sierade di Scuffet, ancjemò protagonist positîf te puarte furlane, dopo vê fermât ancje un tîr di Boyé.

Suns Doc, cercis di lenghis, di teritoris e di identâts jenfri Friûl e Piemont

suns-europe-011216

Musichis, imagjins, peraulis, lenghis e… mangjâ e bevi. La edizion di chest an di Suns Europe, il Festival european des arts in lenghe minorizade, che al è in plen davuelziment a Udin, e cuvierç ancje un altri aspiet de creativitât, des identitâts e de diversitât tant che patrimoni, dirit e oportunitât. Tra un conciert, une proiezion e un incuintri leterari, la manifestazion, metude adun cul jutori de ARLeF (Agjenzie Regjonâl pe Lenghe Furlane) e de Regjon, cul coordenament di Radio Onde Furlane adun cu la cooperative Punto Zero e la associazion Il Laboratorio e cu la colaborazion di une schirie di sogjets e istituzions dal Friûl e dal rest de continent, e cjape dentri ancje trê apontaments specifics dedicâts ae produzion agricole e enogastronomiche des minorancis e des nazions cence stât.

tuma

Dentri dal program uficiâl de rassegne, chescj apontaments a àn il non comun di Suns Doc. Cercis di vins, di lenghis e di teritoris.
La lôr carateristiche e propit chê di meti dongje la tipicitât dai prodots cun chês linguistichis, culturâls e ambientâls. In particolâr – e chest a noaltris di Lidrîs e Butui nus plâs in maniere particolâr… – il mangjâ e il bevi bon e tipic a metin dongje il Friûl che al fevele par furlan e par sloven cun chês zonis dal Piemont là che a vegnin doprâts l’ocitan e il francoprovençâl.

cechin_faedis

Îr, vie pe prime zornade di Suns Europe, la cubiade e je stade chê jenfri il refosc di Faedis e il formadi de Val di Lans / Valle di Lanzo, zone di lenghe francoprovençâl de provincie di Turin, cun cercis de produzion di Cecchini e da associazion dai produtôrs de Toma di Lanzo.

incant

Vuê  la combinazion e sarà chê jenfri il formadi frant di Gortani e la mîl di Consuelo Ferrier di Prajalats / Pragelato, intant che doman lis cercis a tocjaran la gubane di Martinig e il vermouth de Val Maira di Bordiga.

Musichis, imagjins, peraulis, lenghis e mangjâ e bevi: une combinazion sauride!

rof_suns2016

 

 

Il taur, la acuile e la crôs: Turin, Ocitanie e Friûl

udinesemag_cover001

Sul numar 6 de riviste Udinese Magazine, dât fûr li dal Stadi Friûl ai 31 di Otubar pe partide tra Udin e Turin, al è jessût chest articul che al fevele dal Toro, di Turin, dal Friûl e de Ocitanie.

Cui che nol jere a Udin, li dal Stadi Friûl, e che par chel – e magari no dome par chel – nol à rivât a cjatâlu e a leilu, cumò al pues lei chel articul culì…

curvamaratona

Storie, liende, atualitât. Inte suaze dal zûc dal balon tal Stât talian il ‘Toro’ al à un puest particolâr. La sô innomine e va une vore plui innà de citât di Turin, dal Stât talian e dai stes risultâts tes competizions agonistichis. E je une innomine che in chel istès e je memorie, fantasie, mît, sium e salacor ancje consolazion, massime cuant che lis robis, tal cjamp o inaltrò, no van nuie ben.
Il ‘Toro’ al è stât e al è ancjemò un simbul di lote e di sperance. Pal spirt romantic e «barricadero» dal club turinês, Giovanni Arpino al veve inventât une espression di pueste: al veve cjapât ispirazion di un tiermin spagnûl e lu veve clamât «tremendismo granata».

La «Grande squadra del Torino»
Propit chel «tremendismo granata» al è l’element di fonde de identitât dal ‘Toro’ e de sô int.
Te storie taliane il Turin al è deventât un simbul, in particolâr vie pai agns Cuarante dal secul passât. Cul so zûc, cui siei talents e cui siei risultâts, il ‘Grande Torino’ al à rapresentât la volontât e la fuarce morâl di saltâ fûr dai rudinaçs e de devastazion de Seconde Vuere Mondiâl.
Chê stesse scuadre e veve cjapât sù un significât evocatîf, che al lave plui innà dal sport, za intant di chel conflit. Cemût che al salte fûr dal film ‘I nostri anni’ di Daniele Gaglianone, juste in chei agns il riferiment ae «Grande squadra del Torino» al jere deventât une sorte di peraule di ordin par ricognossisi tra antifassiscj e partigjans. Lote, sperance e Resistence.

gigi-meroni-2

Il ‘Grande Torino’ al jere la scuadre dal popul e cul popul. La scuadre di Mazzola, di Gabetto, di Bacigalupo e di ducj chei altris zuiadôrs, ma ancje la scuadre di Oreste Bolmida, il «trombettiere del Filadelfia», che al sunave la trombe par dâur fuarce ai granatas, e di ducj i siei tifôs.

Cussì in chê sere dai 4 di Mai dal 1949, a Superga, no murivin dome chei zuiadôrs e ducj chei altris passezîrs dal trimotôr Fiat G 212, ma al murive ancje alc tal cûr e te anime di dute la int.

E jere une muart che però e deventave risurezion: mît e memorie.
No sarà la uniche. Al baste pensâ ae figure di Gigi Meroni, il cjavelon cui cjalçons inrodolâts, cul so stîl di zûc e di vite e cu la sô muart, ai 15 di Otubar dal 1967, tirât sot di dôs machinis.
Une di chês e jere vuidade di un zovin che passe trente agns plui tart al deventarà il president dal ‘Toro’, Attilio Romero. Une altre disgrazie, un altri mît e un altri segn dal destin, stant che ancje il Turin tant che societât al sarà protagonist di une muart e di une risurezion: il faliment dal 2005 e la rifondazion.

Turin e Friûl
Ogni partide cul Turin e devente une ocasion par confrontâsi cul so mît e cu la sô storie, che e devente almancul in part ancje la nestre. Di cui che i plâs il zûc dal balon. Di cui che i plâs il Friûl. Di cui che si vise che ancje te nestre storie al jere – e al è ancjemò, cundut che al ven masse dispès platât – un «tremendismo» furlan. Di cui che si vise dai diviers zuiadôrs furlans che a àn zuiât tal ‘Toro’: dal clautan Ruggero Grava, ancje lui colât a Superga, al plui cognossût Enzo Bearzot, dal gurizan Giorgio Puia al campion di Italie Vittorio Caporale, di Claudio Sclosa a Massimo Donati. E di cui che si ricuarde che a Turin a son tancj di lôr che a son di divignince furlane: a saressin sù par jù uns vincjmil di lôr.

enzobearzot_toro

Al è ancje un altri aspiet dal ‘Toro’ che al pues tocjânus tant che furlans. A son chês bandieris rossis, cuntune crôs zale cun dodis pomui (trê par ogni braç), che si viodin simpri plui dispès framieç di chês granatas, tal stadi di Turin e ancje inaltrò. A son lis bandieris de Ocitanie, simbul di une identitât cence confins e di une lenghe cuntune nobiltât leterarie antighe che e à patît une minorizazion forsit ancjemò plui penze di chê dal furlan.

lou_dalfin1_granatissimo

L’ocitan al è la lenghe storiche di dutis lis tieris ‘d’Oc’ dai Pireneus aes Alps. A’nt fasin part ancje dodis valadis des provinciis di Cuneo e di Turin, là che la lenghe e esist, e resist e si torne a inventâ cul cine, in graciis di autôrs tant che Fredo Valla, Diego Anghilante e Andrea Fantino, e cu la musiche di tancj di lôr, a tacâ dai Lou Seriol e dai Lou Dalfin, esemplis di «tremendismo» granata e ocitan.

Marco Stolfo

bandieredoc