L’Udin al zuie, al segne, al scombat e al vinç. Finalmentri, dopo trê partidis pierdudis cence fâ nancje un gol, i blancs e neris che si presentin in blu e zâl a rivin a fâ ponts.
Cuintri dal Parma Gotti al sielç di meti in puarte Nicolas. Denant di lui a son Becao, De Maio e Samir in linie difensive, intant che inte mediane si cjatin Ter Avest, Di Paul, Arslan, Pereyra e Ouwejan e in atac e ven confermade la cubie Lasagna-Okaka. Liverani al scuen disegnâ une formazion di emergjence, che però in cjamp e mostre ecuilibri e caratar.
L’intindiment dal mister e dai zuiadôrs al è clâr fint dal principi: zuiâ, segnâ e tirâsi sù de code de classifiche. La scuadre di balon furlane e partìs cul pas just, si svicine al gol cun Samir che al interve cul cjâf sul secont corner de partide ma al tire un tic masse alt e cuntune buine iniziative di De Paul che i da une bale di aur a Okaka, che però nol rive a tirâ inte maniere miôr e Sepe al pare cence fastidis.
Daûr de regule dal gol mangjât gol cjapât, i parons di cjase dopo cualchi minût si cjatin prime cun Nicolas che al à di fâ un intervent in doi timps par fermâ un bon diestri di Kucka e po cun Hernani che al cjape la bale tal mieç dal cjamp e si svicine ae aree furlane, al tire ben in diagonâl e la sô conclusion, che e à ancje la fortune di cjatâ il pît di Samir, e cjape la traietorie juste par finî juste dongje dal pâl a man drete di Nicolas, là che il puartîr nol rive a cjapâle.
L’Udin al rispuint daurman e al cjate la pate cun Samir, che in cheste ocasion al à la smicje juste e il so gnûf tîr cul cjâf su corner al impire Sepe. Inte ultime part dal prin timp a son un pâr di tentatîfs par bande e in particolâr l’Udin al riscje suntune jessude a vueit di Nicolas cun Kurtic al è tal puest just ma nol rive a tirâ in puarte.
La seconde frazion si vierç cui parons di cjase al atac e cul Parma che al rispuint in cuintripît e al va al tîr, fûr bersai, ancjemò cun Hernani che si zove di un assist perfet di Gervinho. L’Udin al torne in vantaç cualchi minût plui tart cun Pereyra che al robe une bale ai aversaris e al scate in profonditât e il so tîr cross al cjate la deviazion di Iacoponi che al met bale inte puarte di Sepe.
L’incuintri al va dilunc cuntun bon ritmi e cuntune schirie di ocasions e di emozions. Il Parma al prove a dreçâ la partide cuntun tîr – masse alt – di Pezzella, intant che la scuadre di balon furlane no mole il vues e e met adun ancjemò cualchi azion ofensive cun Pereyra, cun De Paul, cun De Maio e cun Pussetto, jentrât tal puest di Lasagna, adun cun Makengo in sostituzion di Arslan.
Il Parma al ten bot e vincj minûts prime de fin al rive a segnâ cun Karamoh, che al jentre tal cûr de aree furlane e al impire Nicolas. Il doi a doi al va benon ae scuadre di Liverani, ma par sigûr nol è avonde pal Udin. Lu conferme Gotti, che al clame fûr Pereyra e Owejean e al met dentri ancje Deulofeu e Forestieri cun chê di zontâ fuarcis frescjis ae manovre ofensive. Cussì, a fuarce di dâi, juste tal ultin, e rive la conclusion a fîl di pâl di Pussetto, che al siere une azion imbastide di De Paul e di Okaka e al met la sô firme sul risultât finâl: la prime vitorie furlane de stagjone.
LIDRÎS E BUTUI 