Atalanta – Udinese 2-0

Une altre partide e une altre sconfite. Sei in cjase che in trasfierte lis prestazions dal Udin a van dilunc a jessi marcadis di chel che zaromai di masse timp si pues definîlu efiet Mer…Dacia Arena. Cence Barak, Behrami e Fofana te mediane, là che si viodin dal prin minût Zampano, Balic, Ingelsson, e cun Perica in atac dongje di De Paul, la formazion blancje e nere fin dal principi e patìs la predominance teritoriâl de Atalanta che, cundut che e sedi ancje chê cence cualche titolâr, a tacâ di Ilicic e Spinazzola, e mostre di vê plui ideis e plui fuarce dal Udin.

E rive cussì, dopo trê minûts di zûc, il prin tîr in puarte dai bergamascs, cun Gomez che al impegne daurman Bizzarri. Plui indenant il puartîr dal Udin al à ancjemò il so bon ce fâ suntune pinelade dal atacant atalantin e suntune conclusion di Petagna. Di chê altre bande dal cjamp Perica nol rive a fâ alc e ce par vie de mancjance di riforniments e de buine organizazion de difese nere e celeste. Dome pôcs minûts prime de fin dl prin timp l’atacant cravuat al rive a fâsi viodi des bandis de puarte de Atalanta, ma Gollini al è tal puest just tal moment just e la prime frazion si siere cence goi.

Tal secont timp la musiche e je sù par jù simpri chê, cui parons di cjase cuadrâts e decîs e cul Udin che al cîr dome di difindisi, stant che nol rive a fâ nuie di plui. Cundut achel a son propit i blancs e neris a svicinâsi al gol cun Danilo che al met Gollini tes cundizions di fâ un numar par difindi la sô puarte.

Daûr de regule dal «gol mancjât, gol cjapât», mancul di dîs minûts e rive la segnadure de Atalanta: sugjeriment di Gomez par Petagna che al salte ben, al tocje il balon cul cjâf e lu pare dentri te puarte blancje e nere. L’Udin al riscje il dopli ko cuntun tîr dal furlan neri e celest Cristante, Oddo al mande in cjamp Maxi Lopez al puest di Alì Adnan, ma la pression ofensive blancje e nere e reste grise e flape compagn di prime, intant che  il secont gol de Atalanta al rive pardabon e lu firme Masiello.

Tal ultin cuart di ore la reazion dal Udin no si le viôt. Tra i blancs e neris l’unic che al ten bot fintremai aes trê siviladis di Pairetto al è ancjemò Bizzarri che no ur permet ai aversaris di puartâ a cjase un botin ancjemò plui sostanziôs. Pal Udin e je ancjemò Cuaresime.

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s