Al è muart il mestri Luciano Lunazzi, artist contemporani e furlan dal mont


Une altre brute gnove che e rive dal Friûl e che e tocje la culture furlane contemporanie.
Trê dîs dopo de muart di Pierluigi Cappello, îr al è vignût a mancjâ ancje Luciano Lunazzi.

Cjargnel di Cjaline di Davâr, emigrant in Svuizare, citadin dal mont, artist.
Lunazzi al à vivût e al à cognossût il mont, cun snait e cuntune umanitât vere e no convenzionâl.
Dut chest si à palesât ad in plen te sô art semplice, colorade, visionarie e tal so jessi presint ator par Udin e ator pal Friûl.

Cumò nus restin i siei cartons piturâts, i siei dissens, i siei collages, che nus contin di siums di libertât, di mont, di Friûl e di mont vivût e contât cuntune cjaladure furlane e par chel libare e di liberazion.

Mandi, mestri Luciano!

E graciis di dut.

Advertisements

Omaç ae Catalogne, vuê su Onde Furlane al torne Babêl Europe

Trê dîs dopo de manifestazion inmaneade a Udin pe Zornade Europeane des Lenghis e doi dîs dopo dai fats di domenie stade in Catalogne (il referendum pe indipendence, lis violencis de polizie spagnole, la resistence ghandiane de int…) su lis frecuencis di Radio Onde Furlane al torne Babêl Europe, il program cuindisinâl dedicât ae produzion musicâl tes lenghis minorizadis dal nestri continent.

Il prin apontament dal mês di Otubar di chest an cun cheste trasmission (a undis a buinore) al sarà dedicât dut ae Catalogne, ae musiche par catalan, a ce che al è sucedût tai ultins dîs e tes ultimis setemanis e aes formis internazionalitariis di solidarietât musicâl.

Il viaç musicâl babelic di vuê in direte (ma ancje – in repliche – di doman, miercus ai 4 di Otubar, a une dopo di misdì, e di sabide ai 7, a une e mieze) al tocjarà la Catalogne e plui in gjenerâl i Paîs Catalans e si slargjarà ancje inaltrò, dal Paîs Basc ae Ocitanie e de Galizie ai Stâts Unîts di Americhe, cu lis vôs, tra chei altris, dai Obrint Pas, di Marina Rossell, dai Lou Dalfin, dai Sustraia e ancjemò di Joan Baez, in continuitât cu la trasmission di cuindis dîs indaûr.

Dopo des emissions in direte e in repliche (sui 90 Mhz te plui part dal Friûl, sui 90.2 Mhz in Cjargne e in dut il mont in rêt ae direzion www.ondefurlane.eu), ancje cheste gnove pontade di Babêl Europe si podarà tornâle a scoltâ tal sît internet de radio libare dai furlans.

 

 

Mandi, Pierluigi Cappello

Al è muart Pierluigi Cappello, om zentîl e poete fin.

Si distude la sô vôs, ma nus restin lis sôs peraulis, par furlan e par talian. Peraulis «puaris», vivis e vivarosis.

Lu ricuardìn cun chest articul di Maurizio Crosetti e cuntun so intervent gjavât fûr dal documentari di Marco D’Agostini, I Volti spirituali del Friuli.

Lu ricuardìn cu la «maravee dal frut che al dîs che al à svolât».

Udinese – Sampdoria 4-0

Te zornade che la citât di Udin e mostre di jessi pardabon la capitâl dal Friûl multilengâl, multiculturâl e european, ancje l’Udin – la scuadre di balon – al zuie une partide cun snait e cun personalitât e al torne a vinci dopo vê pierdût trê partidis une daûr di chê altre. Cuintri de Sampdoria, la formazion di Delneri e recupare un pôc di ordin tatic e une buine dose di determinazion, si zove ancje di cualchi erôr dai aversaris e cussì e segne cuatri goi e si puarte a cjase trê ponts une vore pesants.

I blancs e neris si presentin in cjamp ancjemò cun Bizzarri in puarte. La difese e viôt Nuytinck e Angella tal mieç, Larsen a diestre e Samir a çampe, intant che te linie mediane a son Behrami, Jankto e Barak, cun De Paul e Lasagna che a poin la prime ponte Maxi Lopez. Chel dal Udin al è un 4-3-3 dinamic, che si stramude cu facilitât in 4-5-1 o in 4-3-2-1, daûr des dibusgnis dal moment.

La partence e je buine: prime cun Lasagna che al confezione daurman une biele bale par Jankto che al tire fûr bersai, po cun Jankto che al imbastìs une combinazion cun Barak e ancjemò cuntun pâr di conclusions di De Paul e Lasagna. Daûr, la difese furlane e rive a neutralizâ i moviments di Zapata e Quagliarella e i minûts a passin cul Udin che al somee in stât di gjestî la partide te maniere miôr, cun atenzion indaûr e cun continuitât indenant.

Il svolt al rive ator de prime mieze ore di zûc: Il puartîr sampdorian Puggioni al fâs un falat stupit su Lopez, Fabbri al sivile il rigôr e De Paul al segne dai undis metris. Il gol al infuartìs la posizion de scuadre di balon furlane, che no si scompon denant de reazion no cussì incisive dai ospits, che e prodûs dome un tîr di Ramirez. Al è ancjemò timp par che De Paul e Lasagna si svicinin ae seconde segnature e po al rive un altri moment decisîf pal disvilup de partide e a pro dal Udin, cun Barreto che al fâs un fal brut tal mieç dal cjamp e si merete la espulsion.

Il prin timp si siere sul un a zero e te seconde frazion l’Udin, in superioritât numeriche, al continue la so partide positive. Pe Sampdoria, cuntun om di mancul, al è plui dificil cirî di dreçâ la sô partide, intant che l’Udin si zove inte manier miôr de situazion cun Maxi Lopez che al fâs il pont di riferiment denant par De Pauli, Lasagna e Fofana, jentrât al puest di Barak, e cun azions sveltis in cuintripît che a metin in crisi la linie difensive ospite.

I blancs e neris a vuadagnin cussì un altri penalty, juste par un fal di Torreira su Fofana, e Maxi Lopez lu segne. Il doi a zero al siere in sostance la partide, che però e viôt ancjemò l’Udin svicinâsi ae puarte de Sampdorie e segnâ doi goi prime de fin dal incuintri, cuntun biel palonet di Maxi Lopez e ancjemò cuntun rigôr di Fofana.

Cumò al covente che l’Udin al ledi dilunc su chê strade, cence pierdisi pai trois. Dopo de gnove polse dal campionât par vie dai impegns des rapresentativis statâls, i blancs e neris a cjataran su la lôr strade Fiorentina, Juventus e Sassuolo. Sperìn che la scuadre di balon furlan e rivi a fâ ponts ancje cun altris scuadris e no dome cun chês di Gjenue, tant che Genoa e Sampdoria…