Pescara – Udinese 1-3

L’Udin al torne a vinci, finalmentri. I blancs e neris a Pescara a segnin trê goi e a cjapin trê ponts che ur fasin vuadagnâ dôs posizions in classifiche cuntune partide là che a àn rivât a otignî il massim cence sfuarçâsi masse.

Cuintri de formazion vuidade di Zeman, che e palese ancje in cheste ocasion i siei limits, Delneri al torne al 4-3-3, cun Thereau dongje di Zapata e De Paul in atac, cun Badu, Hallfredsson e Jankto te seconde linie e cun Angella al puest di Felipe dongje di Danilo, Widmer e Samir in difese.

L’Udin al partìs cul pît just. Tal stadi Adriatico chê furlane si mostre scuadre concrete e ecuilibrade fin dal principi de partide, cuant che e met adun la sô prime ocasion cuntune biele combinazion Samir-Zapata-Hallfredsson. Il Pescara, che dopo pôcs minûts al piert ancje Stendardo, nol rive a fâ alc e ce: un cross di Biraghi blocât di Karnezis, un tîr di Benali fermât di Danilo e cualchi azion in velocitât che e fâs sunâ la svearine tra i difensôrs dal Udin, che si cjatin simpri tal puest just cuant che al covente.

A passin i minûts e l’Udin al ten bot indaûr e no si piert pai trois indenant, là che Jankto al met in contat la seconde linie cu la prime. Propit il zuiadôr praghês al firme il cross che i permet a Zapata di segnâ il prin gol cul cjâf. Il vantaç al da fuarce ai blancs e neris, che a tegnin bot denant dai tentatîfs di reazion provâts dai pescarês su lis corsiis laterâls e si fasin viodi des bandis di Bizzarri cun De Paul. I parons di cjase a deventin pericolôs dome te ultime part dal prin timp cuntun pâr di iniziativis di Cerri e Mitrita, ma Karnezis nol à fastidis.

La seconde frazion si vierç cuntune tornade indenant de bande dal Udin, in maniere ordenade e cun determinazion. Hallfredsson al distribuìs balons golôs, sei cu la bale in moviment che cu la bale ferme. Propit une punizion batude dal median islandês e met in moviment Jankto che al fâs partî un diagonâl precîs che al tresse la lûs de puarte e al finìs tal sac: doi a zero. Dopo cinc minûts i blancs e neris a imbastissin une altre buine gjeometrie cuntun assist di Jankto par Thereau e cu la conclusion dal atacant di Privas che si zove di une deviazion di Bovo e si distude te rêt daûr di Bizzarri.

Il vantaç dal Udin al somee ad in plen al sigûr. I blancs e neris a gjestissin spazi e timp cun snait e cun sintiment e a van ancjemò al atac cun Badu e cun Samir. Il Pescara al rive a segnâ dome pôcs minûts prime de fin cun Muntari che al profite di un erôr di Kums e al bat Scuffet, che intant al jere jentrât al puest di Karnezis. Si fisse cussì il risultât de partide, ancje se di une bande Jankto si svicine al poker a pro de scuadre furlane e di chê altre al è ancjemò un tentatîf dai parons di cjase.

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s