Udinese – Juventus 1-1

fuarceudinees

Ducj a spietavin la Juve e impen si à viodût soredut l’Udin. La scuadre di Delneri e à fat valê une cierte predominance teritoriâl, e à mostrât snait e personalitât e i à fintremai fat pôre ae prime in classifiche che ae fin e à vût sperimentât, pe prime volte vie par chest campionât e plui in gjenerâl dopo passe un an, il risultât di paritât.
Cussì e je finide cuntun gol e cuntun pont par om, che par dutis dôs lis formazions a valin tant che une vitorie. Pe Juventus al è un altri modon te costruzion dal scudet, massime dopo de vitorie dal Napoli cuintri de Rome; pal Udin al è un segnâl di vite, in tiermins di zûc e di risultât, dopo trê sconfitis une daûr di chê altre e dopo une serie di partidis avonde flapis, là che la miôr e jere stade chê di domenie passade cuintri de Lazio.

La memorie e je tornade ae partide di Turin dai 16 di Otubar, cuant che, cu la rivade di Delneri, l’Udin al mostrave une muse gnove sei sul plan dal zûc sei par ce che al tocje il caratar, al pierdeve cun demerit, ma al vierzeve une gnove dade di risultâts e di prestazions. Vuê al sucedût compagn: il risultât di paritât al è un pôc strent pai blancs e neris, che a àn palesât une determinazion e une consistence miôr rispiet aes ultimis partidis flapis e lamiis, a tacâ di Duvan Zapata, plui dinamic e plui concret che in tantis altris ocasions.

La buine prestazion dal atacant colombian si pues insuazâle intune clime positive gjenerâl e salacor ancje te divierse struture tatiche dal Udin di vuê, cu la difese a cuatri cun Danilo e Felipe centrâi e Widmer e Samir tes corsiis laterâls, cun Halfredsson denant de tierce linie e daûr di Jankto, Fofana e De Paul, cul compit di interdizion e costruzion, e cu la cubie di atac formade di Zapata e Perica, in zûc a tacâ dal prin minût.

La Juve e rive a fâ pôc o nuie. E je imberdeade sei tes fassis che tal mieç e par chel e patìs la concretece di Halfredsson, il dinamisim di Fofana, il bon lavôr di Jankto e De Paul e la pression di Perica e Zapata.
A rivin cussì lis primis conclusions di Fofana e di Zapata, che si zove dai bogns moviments fats di Perica, e po il gol dal colombian, che al jentre te aree juventine cun fuarce, dopo vê passât Bonucci, e al bat Buffon. Pecjât che doi minûts dopo dal vantaç al scugne rinunciâ a Fofana – un dai miôr fin in chel moment – che al va fûr par vie di un brut infortuni (frature dal peron!) e al ven cambiât di Delneri cun Badu.

Sierât il prin timp cuntune azion di Samir, l’Udin al vierç la seconde frazion cun atenzion daûr, cun compatece in ducj i reparts e cun snait e dinamisim ancje in proiezion ofensive, cu lis iniziativis di Widmer, Zapata e Felipe. La mancjance di Fofana si sint e si viôt, la Juve e prove a fâ alc e dopo un cuart di ore e rive a vuadagnâ une punizion – sielte discutibile di Damato, Delneri al proteste e l’arbitri lu pare fûr – che te sô realizazion e devente un cross pal cjâf di Bonucci che al segne l’un a un.

La tension agonistiche e cres, l’Udin nol mole e al prove a tornâ a lâ in vantaç e si svicine un grum al risultât cuntune conclusion di Danilo, in cundizions sùù par jùù compagnis di chês dal gol di Bonucci, ma la bale e sbat cuintri dal pâl. La Juve e prove a rispuindi, stant che e cjate cualchi spazi in plui che tal prin timp, ma il risultât nol cambie, ni di une bande ni di chê altre. L’Udin al met adun almancul altris trê ocasions, ma i ospits si difindin ben e… a puartin a cjase il lôr bon pontut.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s