Lazio – Udinese 1-0

udin

Trasfierte a Rome cence ponts e cence goi fats. Cuintri de Lazio l’Udin al mostre une muse gnove – cun Kums e Jankto al puest di Halfredsson e Fofana tal mieç e cun Matos dal prin minût te posizion par solit di De Paul – ma nol rive a puartâ a cjase nuie di bon, cundut che la Lazio e je dut fûr che un scuadron: e je flape, no rive a sburtâ e no je nancje masse a plomp daûr.

La scuadre di balon furlane e partìs ancje avonde ben, cun dôs ocasions di gol tai prins dîs minûts: une conclusion cul cjâf di Thereau fûr bersai e un tentatîf di Zapata che però al cjate Lulic a fermâlu. La rispueste de Lazio e je avonde limitade, un pôc parcè che e somee ingolfade par so cont e un pôc par vie dal bon lavôr di Widmer e Samir in fase di cuvierzidure, interdizion e rilanç.
I parons di cjase, imbrenât di un Udin ordenât, vie pal prin timp a fasin un tîr in puarte sôl cun Anderson, che la sô conclusion e va fûr, e a provin a jessi pericolôs prime de polse cun Keita.

Il prin timp, che si siere cence goi, al lasse il puest a une seconde frazion, che e manten chei stes ritmis avonde lents e che e ven marcade de continuitât dal pressing ordenât dai blancs e neris. In chestis cundizions e je une altre conclusion di Thereau, là che al interven Radu e po a rivin i cambis fatis dai doi alenadôrs: tal Udin Fofana al cjape il puest di Thereau e te Lazio a jentrin Basta e Milinkovic al puest di Patric e Hoedt.

Cul passâ dal timp Delneri al clame indaûr ancje Martos, cun chê di mantignî il pontut cence grancj fastidis e cun chel stes intindiment al cambie Kums cun Adnan. I blancs e neris si fasin viodi ancje in atac, cuntune conclusion di Jankto fermade di Strakosha, ma a un ciert pont une azion laziâl metude a sun su la corsie di man çampe si siere cuntun cross te aree furlane e cun Pairetto che, su segnalazion dal assistente di puarte Saia, al sivile un penalty une vore discutibil: al tire Immobile e al segne.

La Lazio si gjolt il vantaç, l’Udin al rispuint cun snait – al jentre ancje Perica al puest di Matos – ma lu fâs cun pocje precision e cuant che chest al sucêt al è Strakosha che al fâs il so dovê. E Cussì la partide si siere cu la vitorie dai parons di cjase e cuntune gnove sconfite pe scuadre furlane, che te prossime zornade di campionât e zuiarà cu la Juventus.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s