Udinese – Sassuolo 1-2

udin_neri

La fieste par Zico e la avilizion pal Udin. Ancje la zornade di îr tal Stadi Friûl e je stade marcade a fuart dal efiet MerDacia Arena. La presince in tribune dal Galinho, il campion brasilian che passe trente agns indaûr al veve puartât cun onôr la maie blancje e nere e che ancjemò in dì di vuê al scjalde il cûr dai tifôs furlans, no je stade avonde.
E coventave ancje une scuadre tal cjamp, che e ves snait, cûr e dignitât, ma chê no si à viodude o si à viodude (une vore) masse pôc. Cussì, dopo di une partence avonde buine de formazion di Delneri, il protagonist de partide al è stât il Sassuolo, cul so zuiâ miôr e cul vuadagnâ ducj i ponts a disposizion.

La partence dal Udin e je buine. Cui che al cjale la partide al à fintremai cualchi bon motîf di pensâ che cheste – dopo dal zîr di cjamp di Zico prime de partide – e pues jessi pardabon une zornade storiche e plene di sodisfazions. Dopo siet minûts di zûc al rive ancje il biel gol di Fofana, che di uns vincj metris di distance al cjate la buse juste dentri de puarte difindude di Consigli. Dut ben… pal moment.

Cun di plui il Sassuolo al stente a jentrâ in partide, De Paul al fâs bogns moviments e al pronte assists preseôs pai compagns. A Thereau e a Zapata, però, ur mancje la precision e lis pussibilitâts di dopleâ il vantaç a van dutis sù pai stecs.

I ospits a recuparin ordin, corse e gjeometrie e cul passâ dal timp i ecuilibris de gare a mudin. E tache la eclissi dal Udin e si invie chel che al sarà il predomini de scuadre di De Francesco. Il prin timp si siere cul Udin in vantaç, plui par demerit di Matri, che al mostre di vê une precision sùù par jùù compagne di chê dai atacants furlans, che par merit de scuadre blancje e nere, che in gjenerâl e cale tal zûc, tal moviment e te atenzion.

Cul secont timp, cheste dinamiche si rinfuartìs. Cul passâ dai minûts si palese simpri plui che la uniche scuadre che si viôt tal cjamp e je chê emiliane, massime dopo de sostituzion di Duncan cun Defrel, stant che al è propit il zuiadôr francês l’om de partide, che i met dal so par definî la ande de gare e il so risultât.

Cun di fat, cuatri minûts dopo de sô jentrade in cjamp, al è propit Defrel chel che si cjate tal puest just, su la bale juste par fâ la robe juste: cross di Pellegrini e bale sot des gjambis di Karnezis. Pe realzion dal Udin al covente clamâ ‘Chi l’ha visto?’, intant che il Sassuolo al va dilunc pe sô strade, al cjate il doi a un ancjemò cuntun golon di Defrel e prime de fin si svicine ancje ae tierce segnadure.

Se no si sgarfe – e tant! – il blanc e neri dai furlans al devente grîs.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s