Fiorentina – Udinese 3-0

udin_neri

Dopo de partide lamie e flape ma cuntun pont puartât a cjase cuintri dal Chievo, al rive l’incuintri dome lamiut e flaput cu la Fiorentina, che pal Udin si siere cun trê goi cjapâts e cu la gaiofe vueide.

Nossere li dal stadi Franchi, denant dai parons di cjase che a mostrin di jessi plui fuarts e soredut di vê cualchi motivazion di plui – di chê di cambiâ musiche dopo de partide cu la Rome ae prospetive di rivâ a gafâ un puest pe Europa League – la scuadre di balon furlane e ten bot dome fin a un ciert pont e po il so blanc e neri al devente grîs smamît.

Vie pal prin timp la scuadre di Delneri, che si presente cul classic 4-3-3, cun Zapata, Thereau e De Paul in atac, cun Jankto, Halfredsson e Fofana tal mieç, e cun Samir, Danilo, Felipe e Widmer te tierce linie denant di Karnezis, e fâs avonde biele figure. Karnezis al è atent su lis conclusions di Babacar e Badelj, Samir e Widmer a fasin il lôr lavôr ‘double face’ (indenant e indaûr) su lis corsiis laterâls, Fofana prime e Thereau plui tart si fasin viodi des bandis di Tatarusanu e al è ancje un contat suspiet tra Milic e Widmer, che però par Mariani al è regolâr.

Il spetacul nol è alc e ce, intant che l’ecuilibri al è perfet, almancul fintremai al minût 41 cuant che Bernardeschi al tire une bombe che e cjape la travierse e cussì e devente un assist par Borja Valero, che al anticipe Samir e al segne.

Il prin timp, che si siere cul vantaç dai parons di cjase, al lasse spazi a une seconde frazion che si vierç cun Delneri che al cambie Jankto cun Badu e cun De Paul che al met adun une bale favolose par Zapata. Magari cussì no, l’atacant colombian nol tire te maniere miôr e Tatarusanu al salve la puarte de sô scuadre cence fastidis e cuntun tic di fortune.

Al è il svolt definitîf. La Fiorentina, che in principi e patìs la pression de scuadre di balon furlane, dopo passât il pericul e recupere cjamp e zûc, intant che la sielte di Delneri di gjavâ De Paul e di meti dentri Perica no si mostre par nuie produtive.

Al rive cussì il secont gol dai viole, ancje chel judât de fortune: tîr di Babacar, deviazion involontarie di Samir e nuie ce fâ par Karnezis. A chel pont la partide si siere.

L’Udin nol rive a meti dongje une azion di atac che e sedi une e al passe il timp cence nuie di interessant di scrivi sul cuader dai croniscj. La uniche gnove di notâsi e je chê de tierce segnadure de Fiorentine: Fofana al tocje la bale cu la man te aree di rigôr, Mariani al sivile e dal discut Bernardeschi, il miôr de sô scuadre, nol perdone.

L’Udin al à di tornâ a sgarfâ.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s