Chievo – Udinese 0-0

udin

Une sossedade continue. Chievo e Udin a metin adun une partide flape e lamie, cun trê/cuatri ocasions di gol (dôs/trê pai blancs e neris e une pai parons di cjase) in passe novante minûts. Tante ploie e atacs a sec.

La mancjance di zûc e di spetacul e je tâl che e podarès jessi un câs pe trasmission televisive «Chi l’ha visto?». Cundut achel a son almancul trê elements positîfs: l’Udin nol fâs erorats in difese, l’Udin nol piert, l’Udin al cjape almancul un pont.

Tal prin timp l’Udin al fâs par sigûr alc di plui dai parons di cjase. I blancs e neris a cjapin sù la iniziative, cul om di ordin Hallfredsson e cul dinamisim di Jankto e Fofana, intant che il Chievo al rispuint in cuintripît, ancje se ni lis zebrutis ni i mus a rivin pardabon a fâsi viodi des bandis di Sorrentino e di Karnezis e la uniche conclusion e je un scjuc di Pellissier fûr bersai.

Dopo dal interval la musiche e somee vê un ritmi plui alt, almancul rispiet ae prime frazion. L’Udin al conferme di vê alc di plui par ce che al tocje la determinazion e la iniziative, ma la produtivitât e la precision sot puarte no si viodin: e rive une conclusion di cjâf di Zapata, ma la bale e va unevore plui indalt de travierse.
A passin i minûts e tra i parons di cjase Pelissier al lasse il puest a Inglese, ma tal atac dal Chievo nol cambie nuie.
In difese, invezit, la scuadre di Maran e piert Cesar, che cun doi cartelins zâi al ven al finìs prime la sô partide. Di chê altre bande, pal Udin e rive une conclusion cul cjâf di Samir suntun corner di Halfredsson.

Il ritmi e la tension agonistiche a van al mancul, la fin de partide si svicine e al minût numar 84 e rive l’unic moment di zûc che al merete pardabon ricuardât: punizion di Hallfredsson, spuinde di Danilo, tîr cul cjâf di Ali Adnan e intervent di Sorrentino che al tocje la bale cu la ponte dai dêts e le mande in corner.
Al podeve jessi il svolt de partide, a pro dal Udin. Nol è stât cussì e dopo cuatri minûts di recupar l’incuintri si siere cence vinçûts e cence vincidôrs.

Al reste il fastidi e il gnervôs che al ven cuant che si lei o si sint ator che l’incuintri cui veronês al sarès «il derby dal triveneto» (Di ce? Ma alore al à reson cui che al scrîf che in dì di vuê tal Stât talian a son di plui chei che a pensin che al esisti chest «triveneto» di chei che a crodin che al esistis Diu, cemût che si lei achì a pagjine 125), ancje se al sarès stât compagn se la partide e fos stade plui biele.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s