Udinese – Torino 2-2

FuarceUdinees

Gnot dai muarts e partide une vore vivarose. L’incuintri di nossere tra Udin e Turin al è biel di viodi, siôr di emozions e avonde gjenerôs di sodisfazions par ducj i tifôs, sei par chei furlans che par chei turiniscj.

La partide e finìs doi a doi: un risultât just che al ricognòs la cualitât des dôs scuadris e il disvilup a corint alternade de gare, tra la buine partence dai blancs e neris, la soliditât e il gol dal Toro, la reazion di cûr de scuadre di Delneri, che tal secont timp e vuadagne ordin e fuarce e cussì e rive a ribaltâ il risultât, il colp di Ljajic e i ultins tentatîfs furlans.

Si tache cul Udin che al mostre la volontât di fâ risultât, sburtât indenant di Fofana, Zapata e Thereau, e cul Toro che tal mieç dal cjamp al met dongje pês e sostance, cun Ljajic e Boye su lis fassis esternis e cun Belotti e Benassi che a cirin di profitâ in verticâl te corsie centrâl.
Il gol di Benassi al rive dopo un cuart di ore di zûc, propit cuntune combinazion verticâl tra i doi, che a fasin clopâ Jankto, Danilo e Wague. L’Udin al rispuint cu lis acelerazions di Thereau e di Zapata, che a oblein Boye, Valdifiori e Moretti a doprâ lis manieris fuartis par fermâju e Tagliavento a tirâ fûr il cartelin zâl par punî lis iregolaritâts dai granatas.
E je une reazion di caratar, ma no prodûs alc e ce, dome un tîr di Fofana, intat che il Toro prime de fin dal prin timp al torne a colpî cun Bellotti, ma Karnezis al salve.

Tal secont timp Delneri al cambie i smamît sDe Paul e Kums cun Perica e Hallfredsson, intant che Mihajlovic al fâs dome une sostituzion: fûr Valdifiori e dentri Lukic. L’Udin al vuadagne ordin e intensitât di zûc e in cuindis minûts al rive a segnâ cun Thereau che nol mancje l’apontament cuntun biel cross prontât di Widmer. I blancs e neris no si fermin, il Toro al è scombussât e Thereau, Zapata e Fofana a sburtin ancjemò. Al è cussì che al rive il gol: corner e conclusion di Wague, che al cjape il pâl, batibui in aree e colp decisîf di Zapata.
Il vantaç al somee just e meretât: al fotografe ad in plen la situazion dal secont timp, là che i blancs e neris a somein in stât di rinfuartî il risultât. Di chê altre bande, però, al è il talent di Ljajic, che si cjate tes cundizions di tirâ in puarte cun precision: gol e doi a doi.

A son ancjemò almancul tredis minûts di zûc e a son ancjemò altris emozions, tra une incursion di Zappacosta che al ven fermât di Felipe, cun Mihajlovic che al proteste e al cjape un cartelin ros, e une iniziative di Badu cuntune conclusion fûr bersai di Zapata.
Il risultât al reste chel, cuntun pont par om, che al contente plui o mancul ducj. Pal Toro al è un tornâ a partî dopo de sconfite cul Inter, intant che pal Udin, che nol rive a fâ la tierce vitorie di file, e je la sodisfazion di vê fat une partide avonde buine cuintri di un aversari di cualitât.

Domenie che e ven l’Udin al varà di zuiâ a Marassi cul Genoa.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s