Udinese – Lazio 0-3

udin_neri

Si spietavisi une partide là che la acuile furlane e varès svolât plui indalt di chê de Lazio e là che l’Udin al varès cambiât mentalitât e dreçât il so zûc e i siei risultâts. E impen e je stade une altre serade in stîl (mer)Dacia Arena.

Cuntun zûc clopadiç o ben inesistent, cence gjeometriis, cence pression su lis corsiis laterâls e dome limitât a cualchi lanç lunc. la scuadre di balon furlane e fâs masse pôc par no pleâsi denant de Lazio. Il risultât finâl al fotografe la diference di fonde tra l’Udin in confusion ancje cuant che al prove a fracâ il pedâl dal aceleradôr e la Lazio ordenade, atente, concrete e di buine cualitât tecniche.

Il prin timp si vierç in maniere avonde positive. L’Udin in atac al à finalmentri la cubie Perica-Zapata fin dal principi, cun De Paul daûr di lôr. Il Stadi Friûl al fâs sintî la sô vôs e i blancs e neris a cjapin la iniziative e propit i doi atacants si fasin viodi des bandis de puarte laziâl. La prime conclusion e je de propit de ponte colombiane: un tîr cul cjâf che al va fûr bersai. Po dopo a son i tentatîfs di Kone e Perica.

I blancs e celescj a fasi viodi daurman che a son ancje lôr, cui dialics precîs tra Lulic e Felipe Anderson e cul dinamisim di Keita e di Immobile. A rivin cussì une prime conclusion dal zuiadôr di divignince senegalese, che e ven deviade in corner, e po il gol di Immobile, sui disvilups di un cross de bandierute prontât di Felipe Anderson e cuinçât di Milinkovic.

Il gol al see lis gjambis ai parons di cjase. L’Udin al stente a imbastî une azion che e sedi une e i siei pôcs atacs a saltin fûr di iniziativis individuâls. Il prin timp si siere cul vantaç dai ospits, che dopo de polse a somein ancjemò plui determinâts, sburtâts di Lulic e Keita, che al tierç tentatîf consecutîf al segne il gol dal doi a zero.

L’Udin al è in zenoglon e a pene passât il prin cuart di ore de seconde frazion al rive ancje il tierç pataf te muse dal Udin e dai siei tifôf, firmât ancjemò di Immobile.

Iachini al clame fûr De Paul e al met dentri Peñaranda. I blancs e neris, cun trê pontis, a provin a tornâ a puartâsi indenant, ma lu fasin in maniere disordenade e intermitente. A un ciert pont Perica al ven butât jù in aree, ma par Russo al è dut regolâr.

La Lazio e gjestìs il vantaç cence fastidis, l’Udin si eclisse – cu la ecezion di Perica – e il public dal stadi Friûl al palese dut il so aviliment cun berlis e siviladis indreçadis a zuiadôrs e societât.

No si pues lâ indenant cussì.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s