Sassuolo – Udinese 1-0

udin_neri

No si pues pratindi di fâ un risultât positîf se si zuie dome un timp o nancje chel.
La partide di îr dal Udin cuintri dal Sassuolo e je lade propit in cheste maniere: tal prin timp e à zuiât dome la scuadre emiliane e te seconde frazion, massime te ultime part, si à fate finalmentri viodi in atac ancje la formazion di Iachini.

I blancs e neris a Reggio Emilia si presentin cuntune formazion avonde sorprendente, parcè che in atac a son Penaranda e Thereau, intant che Perica e Zapata a vegnin tignûts in bancjine. In puarte al è Karnezis, la linie de difese e je formade di Heurtaux, Danilo, Felipe e Adnan e te zone mezane dongje di Kums a son Jankto e Kone, cun De Paul daûr des dôs pontis. Il Sassuolo al à une formazion cence diviers titolârs, a tacâ di Berardi, Cannavaro, Duncan, Gazzola e Missiroli, però al mostre di vê plui snait e plui convinzion dai aversaris.

La superioritât dai parons di cjase si palese za tai prins vincj minûts di zûc, cuant che dutis dôs lis scuadris si studiin e si controlin e a fasin avonde pôc indenant. Chel pôc di plui lu fâs il Sassuolo: la sô prime conclusion al è un colp cul cjâf di Antei che al va fûr bersai e lis sôs azions plui pericolosis a vegnin imbastidis su la corsie di man drete cun Lirola e Politano che mandin fûr zîrs la cubie blancje e nere formade di Jankto e Adnan.

Propit di un cross di Lirola, passade la mieze ore dal prin timp, al rive il gol di Defrel, che al profite inte maniere miôr de scjarse atenzion mostrade in chê ocasion sei di Adnan che di Karnezis. Iachini al cambie De Paul, che al somee la fanatasime di chel zuiadôr che si veve fat preseâ in altris ocasions, cun Zapata, ma la musiche no cambie di un et. L’Udin al fâs pôc o nuie, intant che il Sassuolo al incrès il ritmi de sô manovre e al mande al tîr Politano e Ragusa, che a impegnin Karnezis prime dal interval.

Tal secont timp i parons di cjase a mantegnin la lôr condote di gare: si difindin cun ordin e a masanin zûc de metât dal cjamp indenant. Par fortune al cambie alc tal Udin, che cul passâ dai minûts al scomence a costruî cualchi azion e a jessi plui incisîf e determinât, cun Perica che, jentrât al puest di Penaranda, al mostre di jessi in forme e al conferme la legjitimitât de domande in cont de sô mancjance tai undis titolârs.

Tal ultin cuart di ore l’Udin al cjape il control de partide.
Il cravuat al fâs un biel cross par Zapata: il colombian al tire, ma su la linie de puarte al cjate Acerbi che al met un blic. Cualchi minût plui indenant ancjemò Perica al tire, ma il balon, tocjât ancje di Antei, al va a sbati cuintri de travierse e Kone nol rive a brincâlu e a butâlu dentri. Te azion seguitive l’Udin al cjape une altre travierse cun Felipe su corner di Kums.

Prime de fin a rivin ancje un gol di Heurtaux, che nol ven convalidât di Doveri par vie di un contat tra Perica e Peluso, e un tîr pericolôs di Pellegrini che al va fûr bersai di pôc.

Pal Udin e je une sbrissade indaûr in classifiche. Lis prossimis partidis a saran cu la Lazio e cu la Juve. Al covente cambiâ musiche.

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s