Udinese – Fiorentina 2-2

fuarceudinees

Dopo vê meretât di pierdi cu la Rome e cul Chievo e dopo vê vinçût ancje cuntun tic di fortune cuintri di Empoli e Milan, l’Udin al sperimente pe prime volte ta cheste stagjon il risultât di paritât, cuntun pôc di marum, daûr di cemût che a son ladis lis robis vie pe partide.

Il 2-2 di nossere cu la Fiorentina al à mostrât une scuadre blancje e nere une vore miôr di chê smamide di domenie: dinamiche in atac, cu la ispirazion di De Paul, cun Perica finalmentri titolâr e cun Zapata finalmentri ‘zapatist’; a vonde ordenade te fasse mezane, ancje se Kums nol è ancjemò al top; discrete ancje indaûr, là che però la difese e à cualchi amnesie di masse, che e paie cui interès…

La formazion di Iachini e presente diviersis novitâts: nol è dome Perica dal prin minût, ma a son ancje Adnan al puest di Armero, Heurtaux al puest di Widmer e Kone al puest di Hallfredsson, te seconde linie dongje Kums e Badu. La Fiorentina e somee une vore atente e compate, però i mancje chel snait che e veve mostrât cuintri de Rome. Cussì al è l’Udin che al cjape sù la iniziative par prin, cun determinazion e cun agressivitât.

La prime sunade di trombe e je une punizion di Kums. Po dopo a rivin un cross di Adnan, une conclusion centrâl di Badu e dôs acrobaziis di Zapata fûr bersai. La Fiorentina no si scompon masse, e fâs zirâ la bale in orizontâl e e prove a rispuindi su lis fassis laterâls cun Tello e Bernardeschi, ma i concret no rive a fâsi viodi des bandis di Karnezis.

Al minût numar 26 al rive il gol di Zapata, che al bat Tatarusanu suntun biel assit di De Paul. I doi sudamericans blancs e neris a imbastissin daurman une altri pâr di combinazions: a son bielis e buinis, ma il puartîr viola al è simpri tal so puest e il risultât nol cambie. In curt il gol al rive, ma ta chê altre puarte, cuntune azion di Tello che si zove di une mieze (?) distrazion difensive, al libere Babacar e lu met in cundizions di tocjâ la bale cul tac e di firmâ in cheste maniere l’un a un.

La reazion dal Udin e je imediade, la Fiorentine e je atente e cussì la ultime part dal prin timp e je plasevule e vivarose. In cheste suaze a rivin une buine ispirazion di Danilo par Badu, une biele parade di Karnezis suntune punizion di Bernardeschi, une percussion di Perica che e permet di vuadagnâ il corner che juste prime de polse al puarte al gol di Danilo che cuntune conclusion cul cjâf al segne il 2-1.

Tal secont timp la musiche no cambie alc e ce. La Fiorentina e continue la sô gjestion de partide atente e concrete, cun cualchi acelerazion in plui, e l’Udin no si limite a difindi il vantaç, ma al prove ancjemò a puartâsi al atac. In cheste fase di ecuilibri, Tal zîr di sùù par jùù cinc minûts di zûc al rive l’episodi che al mude la fisonomie de partide e che al segnarà il risultât finâl: Babacar al jentre te aree blancje e nere e Adnan lu tocje, Mazzoleni nol à dubis tal considerâ chel contat tant che un fal e al ordene il penalty, che al ven tirât di Berardeschi e al è 2-2.

La concuiste de paritât e somee contentâ i ospits, intant che l’Udin al mostre di provâ ancjemò a sburtâ in direzion de puarte difindude di Tatarusanu cun Zapata in evidence, cun Perica che al lavore sot vie e cun De Paul che al sugjerìs pai compagns e al va ancje al tîr, su punizion e su azion.

La scuadre di balon furlane e conferme la sô propension ofensive, cu lis sostituzion di Perica cun Peneranda e di Zapata cun Thereau. Al è soredut il venezuelan a fâsi viodi indenant, intant che daûr no mancje cualchi imprecision che e riscje di deventâ pericolose.

La partide e finìs sul 2-2. Un pont vuadagnât o di pierdûts? Cuissà… Par sigûr e je stade une prestazion positive, al net di cualche erôr di masse in difese, e une bocjade di aiar bon, che si spere di tornâ a cjapâ cun plui continuitât vie pe stagjon 2016/2017.

A proposit di bocjade di aiar bon, si pues definîle cussì ancje la scrite par furlan che e je saltade fûr te tribune dal implant dai Riçs, «La passion e je la nestre fuarce».
Al è un segnâl che finalmentri si scomence a viodi alc di ce che al proviôt l’acuardi fat sù par jù un an indaûr de societât blancje e nere, dal Comun di Udin e de ARLeF (Agjenzie Regjonâl pe Lenghe Furlane).
E al è alc di bon e di just, che al zove ae lenghe, ae int e ancje a scuadre e societât. O pensìn che se il Stadi Friûl al è plui Friûl e plui furlan, ancje la scuadre e va miôr e no si sint chel efiet (mer)Dacia Arena.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s