Udinese – Chievo 1-2

udin_neri

Nuie ce fâ. Il sium dal Udin di vinci la tierce partide di file, dopo dai sucès cuintri di Empoli e Milan, si sfante a mancul di dîs minûts dal novantesim e chel di puartâ a cjase almancul un pont e mantignî in dut câs une ande positive al va a sfracaiâsi tai minûts  di recupar.

Cuintri dal Chievo, la scuadre di balon furlane e conferme, compagn che te stagjon passade, che «tertium non datur», no dome in gjenerâl pe continuitât dai risultâts ma soredut in cont dal fat di rivâ a vinci ancjemò une volte dopo vê patît la superioritât tecniche, tatiche e agonistiche dai aversaris: une situazion che e je stade une vore relative la setemane stade a Milan e une vore plui fuarte te prime partide in cjase cuintri dai toscans.

Il Chievo al zuie miôr dal principi ae fin, cun ordin e cun continuitât fin dal principi, ancje se cence grande precision tes conclusions. L’Udin, che al è cence Widmer, si presente une altre volte in formât 4-3-1-2, cun Thereau e Zapata in prime linie, De Paul daûr des pontis, Kums tal mieç e Wague in difese a tacâ dal prin minût, e al mostre di patî daurman il dinamisim e la personalitât dai aversaris.

Tai prins vincj minûts il Chievo al va in zone tîr cinc voltis, simpri fûr bersai, intant che l’Udin nol rive a fâ alc e ce, cun De Paul distudât, Thereau model fantasime e Zapata che al somee in cundizions miôr rispiet aes partidis passadis (almancul in tiermins relatîfs). Al è propit l’atacant colombian chel che al da un svolt ae partide, profitant di un moment di polse dai aversaris: biel cross di Hallfredsson e conclusion tal spieli de puarte là che no rivin lis mans di Sorrentino.

Prime dal interval il Chievo al torne a puartâsi al atac e al prove a butâle dentri, cun Inglese e cun Meggiorini, ma Karnezis al è atent. Tal secont timp i ospits a son ancjemò plui determinâts, intant che l’Udin al disparìs. A rivin cussì il cuasigol di Cacciatore e il gol di Castro, che al siere un cross di Hetemaj che si zove de corezion cul cjâf di Pelissier: un a un.

La partide e va indenant ma l’unic segnâl di vite dal Udin al è la jentrade di Perica al puest di Thereau, che però nol rive a meti la sô çatute par dreçâ la situazion. Di chê altre bande, intant, il Chievo nol mole, al va dilunc a esprimi la sô supremazione tatiche, tecniche e agonistiche e juste vincj seconts prome de fin dai cinc minûts di recupar decretâts di Pairetto al rive il gol decisîf di Cacciatore.

Vitorie meretade da Chievo e sconfite plui che meretade pal Udin, une altre volte ad in plen in stîl (mer)Dacia Arena.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s