Milan – Udinese 0-1

FuarceUdinees

Un piruç di Perica e l’Udin al vinç ancje a Milan. Pe scuadre di balon furlane la tierce di campionât e va inte maniere miôr, massime par ce che al tocje il risultât, che al puarte i blancs e neris al siest puest in classifiche cun sîs pont.

La partide cuintri dal Milan e va miôr di chê di cuindis dîs indaûr cul Empoli: la scuadre di Iachini e somee plui decise e plui ordenade in ducj i reparts, cun Thereau in atac che al zonte potence e determinazion e cun Halfredsson e De Paul che a fasin il lôr inte fase di interdizion e in chê di impostazion, intant che l’esordi di Kums nol è stât cussì memorabil.

I milaniscj a scomencin al atac, cun determinazion. I prins cinc minûts a son ducj dai parons di cjase, intan che i blancs e neris si fasin viodi dome un tic plui tart: cuintripît di Thereau e conclusion fûr bersai di De Paul. Il Milan al cîr di imponi la sô supremazie teritoriâl, ma Montolivo al ven tignût sot voli di De Paul e Bacca nol mostre di jessi cussì pericolôs.

L’Udin al clope un pôc de bande di Armero, ma Karnezis nol à mai nissun probleme, intant che De Paul e Thereau a imbastissin un pâr di ocasions indenant e almancul intun câs a dan un tic di lavôr a Donnarumma. A passin i minûts, il Milan al torne a insisti, ma lu fâs cence ordin e cence fortune, stant che la sô conclusion miôr, chê di Sosa, e va a sbati cuintri de travierse dal Udin

Il prin timp si siere cence goi e il secont si vierç cuntune ande avonde flape. In chest contest, des dôs scuadris tal cjamp, chê che e somee in stât di fâ alc di plui e je proprit chê blancje e nere, cun Widmer e Felipe che si fasin viodi indenant, cun De Paul che al prove a disvilupâ zuiadis in cuintripît e Thereau e Zapata che a fasin avonde moviment.

Dopo un cuart di ore Iachini al clame fûr Thereau al met Perica al so puest. L’Udin al continue a zuiâ in difese cun atenzion e in atac cun plui dinamisim dal Milan, là che dongje di un Bacca za avonde smamît no si viodin plui ni Sosa ni Suso, che tal prin timp a vevin zuiât avonde ben, e dome Bonaventura al prove a colpî Karnezis, che però al è pront tal so puest.

Tai ultins cuindis minûts, Montella al zuie la cjarte Honda, che al jentre al puest di Sosa. Il Milan cussì al prove a tirâ fûr lis ongulis, l’Udin al à un câl di tension, però si salve ancjemò cun Karnezis che al interven par ordin propit suntune iniziative dal atacant gjaponês.

Si svicine la fin dal timp regolamentâr e al rive il gol dal Udin. Badu le met tal mieç e Perica le tire in puarte, la bale e tocje ancje la schede di Abate, Donnarumma nol rive a brincâle e i blancs e neris a van in vantaç.

Si zuie ancjemò par passe vot minûts, ma il risultât al reste chel.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s