Milan – Udinese 1-1

udin_neri

Un timp a zuiâ, un timp a scombati e a resisti. L’Udin a Milan si compuarte sù par jù in chê stesse maniere di Empoli e cussì al puarte a cjase un altri pontut.
Lu fâs cuntune formazion divierse di chê di miercus passât,  cu la tornade di Danilo tal mieç de difese, cun Kuzmanovic te posizion là che al jere Bruno Fernandes, cun Armero a çampe e cun Edenilson a drete te seconde linie e cun Matos in cubie cun Thereau, e no cun Zapata, in atac.
E lu fâs ancje cuintri un aversari diferent: chê altre sere a jerin i toscans, une scuadre ecuilibrade di nivel discret che e je protagoniste di un bon campionât; in chest câs al è il Milan, une potence un tic decjadude, che però tes ultimis dôs partidis e à simpri vinçût e che e à chê di continuâ a vuadagnâ ponts e puescj in graduatorie.

Tal prin timp la scuadre che e prove a zuiâ cun plui continuitât e je chê blancje e nere. Cuvierte ben indaûr, cu la marcjadure strente di Wague su Niang, la formazion di balon furlane e ten bot denant dai prins atacs dai parons di cjase, che po a calin, propit par vie che no ur permet di fâ alc altri di miôr.
L’Udin al ocupe ben i spazis e al rive ancje a imbastî cualchi zuiade di sest, che e oblee Donnarumma a vuadagnâsi il pagnut su lis conclusions di Thereau e di Kuzmanovic.
Al tierç tentatîf bon al rive ancje il prin gol de stagjon di Armero: une sorte di certificazion di cemût che a van lis robis al Meazza.

La reazion dal Milan no je alc e ce. La scuadre di Mihajlovic e patìs tal mieç dal cjamp la mancjance di Bonaventura, che si à sinistrât vinars in alenament, e si svicine des bandis di Karnezis dome cun Bacca, che al segne ma al è in fûr zûc, cemût che al marche par ordin Irrati.

Tal secont timp il Milan si dismôf, cun Balotelli che al jentre al puest di Kucka e al ven metût dongje di Bacca, intant che tal scheme ros e neri Niang al cjape la posizion che e jere dal zuiadôr slovac.

Il public di San Siro al vûl alc di plui dai siei, però dopo doi minûts prime al cjape une pôre mostre par vie di une ocasionone par Lodi, che si cjate di bessôl denant di Dommarumma, po al tire flât parcè che il centrocampist dal Udin nol segne. Un minût plui tart al fâs fieste, stant che daûr de regole dal “gol falât, gol cjapât”, la ocasion pierdude dal Udin par sierâ la partide e lasse spazi ae ocasion pai ros e neris di tornâ a vierzile cun Niang.

L’un a un al cambie i ecuilibris: l’Udin al disparìs, al bade dome a difindisi e i lasse metris di cjamp al Milan, che al sburte indenant, cun Bacca e cun Balotelli. Cumò i tocje a Karnezis di jessi tal puest just tal moment just: il puartîr dal Udin al è atent e puntuâl e cuant che nol rive lui, lu jude un tic di fortune. Al è ce che al sucêt suntun biel tîr di Bertolacci, cu la bale che e sbat su la travierse, e va intor di Karnezis e po e baline su la linie de puarte cence passâle.

Prime de fin de partide al è ancjemò timp pes protestis di Balotelli, che al domande un rigôr, e par une bile parade di Karnezis, par sigûr un dai miôr dal Udin, adun cun Badu e cun Matos, che al conferme la buine prestazion di Empoli.

Domenie a Udin al rivarà il Bologna.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s