Udinese – Atalanta 2-1

 

FuarceUdinees

Al è un bon principi di 2016 chel dal Udin. La scuadre di balon furlane e vierç l’an gnûf cuntune vitorie biele e buine: biele, parcè che e je il risultât di une partide zuaide ben in tiermins sei di cualitât sei di cuantitât e di tension agonistiche; buine, parcè che i trê ponts cjapâts a son impuartantons in gjenerâl e in particolâr inte classifiche di cumò, là che i blancs e neris si cjatin plui o mancul tal mieç, propit dongje de Atalanta e de Lazio.

Il doi a un cuintri de Atalanta al madrès za vie pal prin timp,cuant che l’Udin al impon la sô superioritât teritoriâl in ducj i setôrs dal cjamp, al met adun diviersis ocasions e al segne i doi goi cun Thereau e Perica.

La cubie di atac furlane e je produtive, ancje parcè che daûr a son Lodi che al coordene la manovre, Widmer che al sburte su la sô corsie esterne e Bruno Fernandes che al garantìs dinamisim, fantasie e colegaments tra la seconde e la prime linie, cence dismenteâ la difese, atente e ordenade, che no si scompon denant dal pressing imbastît de bande dai ospits, cun Karnezis che al ten di voli i pôcs tentatîfs ofensîfs dai aversaris.

Il prin gol di Threau al rive dopo vincjedoi minûts di zûc e dopo un pâr di ocasions pai blancs e neris: un tîr cross di Widmer, un prin tentatîf dal atacant francês e un contat almancul suspiet tra De Roon e Perica te aree di rigôr bergamasche, che nol ven viodût de bande di . L’un a zero al ven segnât ae conclusion di une azion partide di un corner, cun Felipe che al tire cul cjâf, Sportiello che al ferme la bale e Thereau che le cjape e le bute dentri.

La reazion dai ospits no prodûs alc e ce, l’Udin al gjestìs inte maniere miôr il vantaç e al prove a dopleâlu cun Bruno Fernandes, che nol cjate il bersai. Al è plui precîs, di chê altre bande, Gomez, però Karnezis al pare cence fastidis, intant che no rivin a jonzi nessun risultât nancje i tentatîfs di D’Alessandro. Il prin timp al somee indreçât a sierâsi sul un a zero, ma juste tal recupar alr ive il secont gol furlan: lu segne Perica, che cul cjâf al met tal sac un biel cross di Bruno Fernandes.

Tal secont timp la Atalanta e prove a dreçâ la partide e cussì e frache il pedâl dal aceleradôr, intant che l’Udin al ten bot daûr e al rispuint in cuintripît. Propit i blancs e neris, tal zîr di nancje dîs minûts, si svicinin al tris, prime cun Danilo, po cun Bruno Fernandes e po ancjemò cun Thereau, che al bat Sportiello, ma Cervellera i dinee la sodisfazion de doplete par vie che al calcole in fûr zûc la posizion di Badu.
Cussì, dopo dal trê a zero pal Udin che si sfante , si crein lis cundizions pal gol da bergamascs, che al rive ator de mieze ore de seconde frazion cun D’Alessandro, che al profite di un pastroç di Edenilson, suntun cross di Gomez, e al segne.

L’Udin al rispuint cun Iturra, jentrât al puest di Bruno Fernandes, e tai ultins minûts ancje cun Duvan Zapata, che al torne in cjamp dopo passe doi mês di infermerie, al puest di Perica, e al conclût in maniere pericolose ma un tic fûr bersai. Ae fin de partide al è ancjemò Gomez che al cole te aree blancje e nere, ma par Cervellera nol è rigôr.

A coventin ancje cinc minûts di recupar prime de fin de gare e de conferme dal sucès dai blancs e neris.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s