Verona – Udinese 1-1

Un gol cjapât, un fat e un altri pontut puartât a cjase. Un dai aspiets plui positîfs de partide cul Verona al è il risultât, une paritât che e permet ae scuadre furlane di no sbrissâ plui in jù te classifiche dal campionât. Dongje di chel si puedin preseâ la prestazion di Bruno Fernandes e il fat che – almancul di ce che o vin let, viodût e sintût ator – nissun al à doprât pe partide dal Bentegodi la definizion fastidiose di ‘derby del triveneto‘….  Pal rest la partide e je stade avonde brute e l’Udin al à zuiât cun grinte soredut tal secont timp, cuant che al à vût un ategjament tatic e psicologjic plui indreçât viers dal atac.

In principi i blancs e neris si presentin cuntun 3-5-1-1, là che Di Natale al è la uniche ponte vere e proprie e Bruno Fernandes i sta dongje ma al torne ancje indaûr par mantignî i contats cu la seconde linie, cun Lodi in cabine di regjie e Edenilson e Adnan cul compit di sburtâ su lis corsiis laterâls. Il Verone al mostre di vê alc di plui in tiermins tatics e di convinzion e al cjape sù la iniziative, tant che scuadre parone di cjase. L’Udin no si scompon e al ten bot, cun Lodi e Iturra tal mieç, e al met dongje ancje un pâr di azions ofensivis, là che al è fondamentâl il contribût di Di Natale e Bruno Fernandes al tire in puarte in maniere avonde pericolose par Rafael.

Il prin timp al va indenant cun cheste ande avonde grise e dome tal ultin cuart di ore Lodi al prepare un biel zugjeriment par Edenilson, che però al in fûr zûc, e po al rive il gol dal Verone. Siligardi al jentre te aree di rigôr e tal moment che si vicine a lui Wague al è maliziôs tal colâ par tiere e tal vuadagnâ une penalty avonde discutibil. Il tîr dal discut lu bat Pazzini e par Karnezis nol è nuie ce fâ, intant che dopo pôc timp Lodi al tente di fâ un a un cuntune punizion, ma Rafael i dîs di no.

Tal secont timp l’Udin al mostre plui grinte, soredut dopo de jentrade tal cjamp di Thereau al puest di Iturra e di Badu al puest di Marquinho. L’atacant francês al zonte pês e pression inendant, là che i blancs e neris a son plui vivarôs ancje par vie de zonte di Perica. Tal ultin cuart di ore di zûc al rive il gol dal un a un: cross di Bruno Fernandes e conclusion a bersai di Thereau.
Prime de sivilade finâl ancje Perica al à la ocasion buine, ma nol rive a metile dentri. Pecjât, ma forsit al è plui just cussì.

Cumò l’Udin al à di preparâsi pe partide in cjase cuintri dal Frosinone, matricole che si cjate a pene daûr dai blancs e neris in graduatorie ma che e mostre di jessi jentrade ad in plen cul cjâf, cul cûr e cu lis gjambis dentri de serie A, cemût che al salte fûr dai siei ultins risultâts, a tacâ de vitorie taronde cuintri de Sampdoria.

Par chê ocasion al coventarà un Udin miôr di chel viodût a Verone. Magari cun Thereau, Wiedmer e Piris in cjamp a tacâ dal prin minût.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s