Udinese – Genoa 1-1

L’Udin al fâs il so prin pont in cjase di cheste stagjon. Al è chest l’element miôr de partide di îr cuintri dal Genoa, là che la scuadre di balon furlane e à mostrât ancjemò une volte pocje cualitât tatiche e tecniche e e à tirât fûr plui grinte e plui caratar dome tal secont timp.
Il risultât finâl al è just, stant che il Genoa al è stât plui incisîf tal prin timp, intant che i parons di cjase a àn fat miôr dopo de polse e che insom de partide a son lâts une vore dongje de vitorie finâl.

Par sigûr la partide di îr e à mostrât intune altre ocasion la fuarce di Totò di Natale, de sô personalitât, de sô classe, dal so istint e de sô esperience. Il cjapitani al segne il gol dai blancs e neris: une biele gnove par lui, che al jere ancjemò a sec in cheste stagjon, e pal Udin, soredut cumò che Zapata al è in infermerie.
Al reste però il dubi, che al devente une preocupazion, tignût cont che il grant Totò al à i siei agns, in cont dal fat che, compagn che tai ultins doi agns, l’Udin al vedi di dimpindi asse dal so capitani.

Dongje di Di Natale, un altri protagonist positîf dal Udin al è stât une altre volte Karnezis, che si lu à viodût intervignî ben e in maniere decisive, in particolâr suntun tîr cross di Perotti deviât pericolosamentri di Wague e suntune conclusion di Gakpè prime de fin dal print timp e ancjemò prime de fin de partide.

Te prime frazion di zûc i ospits a àn il control dal centricjamp, là che l’Udin, cundut de presince di Lodi a tacâ dal prin minût, al stente une vore, cul risultât di lassâ di bessoi e masse pôc operatîfs Di Natale e Thereau. Di chê altre bande a son une vore plui atîfs Perotti, Gapkè e Capel, ancje se la linie difensive furlane e rive a tignî bot, un pôc par merit so e un pôc par vie i gjenoans indenant no àn dute la luciditât che e covente. Tai prins cuarantecinc minûts l’Udin si fâs viodi des bandis di Lamanna dome cuntun tîr di Di Natale, che dopo dal scuintri cun Di Maio sul imprin de partide al zuie cuntune gruesse fassadure sul cjâf.

Tal secont timp l’Udin al somee une altre scuadre e al cjate daurman la strade dal gol cun Di Natale che al colpìs a frêt la difese rosse e blu, profitant di un so moment di disorientament: Felipe i zire une biele bale cul cjâf e Totò le met tal sac.
Il Genoa al reagjìs, fuart de gnove energjie che e rive di Pavoletti, ma Karnezis al fâs simpri il so lavôr cun atenzion e l’Udin al sielç di rifuartî la linie di difese e di tentâ la rispueste in cuintripît.

Dopo un cuart di ore la bale e jentre te puarte blancje e nere, ma il tîr di Pavoletti al è anulât par vie di une iregolaritât.
La scuadre di Gasperini e prove ancjemò a puartâsi indenant cun Perotti. Al è propit l’argjentin il zuiadôr che al segne il gol dal un a un: lu fâs cuntun rigôr tirât in maniere perfete, che no i lasse nuie ce fâ a Karnezis. Il portîr grêc al neutralize, dopo cualchi minût, une biele conclusion di Pavoletti, intant che tai minûts finâi al è Lamanna chel che si vuadagne il pagnut, suntun tîr di Marquinho, e l’Udin si vicine ancjemnò intune altre ocasion al sucès finâl, cun Widmer che cul cjâf al cjape la travierse.

Al finîs un a un e Udin e Genoa si cjatin a siet ponts, compagn di Palermo e Empoli, tes zonis bassis de classifiche.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s