Udinese – Milan 2-3

L’Udin al piert ancje cuintri dal Milan. La scuadre di Colantuono e zuie un prin timp flap e smamît e dopo dîs minûts e je za sot di doi goi, intant che e finìs il prin timp fintremai cuntun passîf di trê rêts. Dopo dal interval i blancs e neris si stramudin, sei sul plan tatic che in tiermins di spirt e di caratar, a mostrin cûr, gjambis e cerviel, ma nol è avonde. Cussì la lôr situazion in classifiche e je ancjemò plui grivie, cun dome trê pont in cinc partidis e cun cuatri sconfitis une daûr di chê altre.

I blancs e neris a jentrin in cjamp cun Domizzi titolâr in difese, al puest di Danilo, infortunât, e ancjemò cence Widmer. In atac il mister al sielç la cubie Di Natale – Thereau, intant che in cjase milaniste Mihajlovic al manten la promesse di fâ zuiâ Balotelli fin dal principi.
SuperMario nol tradìs la fiducie dal tecnic serp e dopo cinc minûts si concuiste une buine punizion – fal di Iturre – e le trasforme inte maniere miôr, stant che Karnezis nol rive a fâ nuie altri che lâ a recuperâ la bale tal sac. Ancjemò altris cinc minûts di partide, plui o mancul a sens unic, apart un colp cul cjâf di Thereau, e e rive ancje la seconde segnadure dal Milan: Montolivo al pescje indenant Bonaventura, che al salte Badu e le bute dentri.
L’Udin al patìs il ko, al è sdrondenât, al prove a fâ alc, ma al mostre di rivâ dome fin a un ciert pont. Bacca al podarès segnâ il tierç, ma su la sô strade al cjate Karnezis, cussì il tris milanist al rive juste prin de polse cun Cristian Zapata, che al fâs chel dal ex cul cjâf, su corner di Bonaventura.

Su lis tribunis di chel che pal moment si clame ancjemò Stadi Friûl – e che al sarès ben che si clamàs ancjemò cussì e soredut che al ves alc di plui di furlan, in ducj i sens – l’aviliment al è gjenerâl e soredut justificât, tra marcjât, prestazions e politichis societariis, e i trê goi cjapâts a pesin tantonon.
Al è legjitim pensâ che mister e zuiadôrs a vedin vût alc ce dî, vie pal interval, stant che l’Udin al torne in cjamp cuntune altre muse cuntune idee di zûc: Piris al reste fûr e al jentre Duvan Zapata, la scuadre e partìs cu la britule in man e intal zîr di pôcs minûts al rive il gol di Badu. Cumò al è il Milan che al tartaie, denant de furie dal atac furlan e soredut di Duvan Zapata, che al siere cul gol une biele iniziative di Thereau, e che al va une vore dongje ae rêt de paritât.

De pression blancje e nere a saltin fûr dome corners e punizions: il Milan al tire sù la muraie di difese e al manten il vantaç, ancje dopo des ultimis conclusions di Bruno Fernandes e di Wague.
La prossime partide e je in trasfierte, cul Bologne: a coventin la grinte dal secont timp di nossere e si scuen fâ ponts. Se di no, o sin proprit malamentri.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s