Juventus – Udinese 0-1

fuarceudinees

Il sium dai tifôs di dutis chês altris scuadris dal Stât talian al è chel di une vitorie cuintri de Juve, soredut a Turin. Cun di plui, tancj di lôr a volaressin ancjemò alc di plui: il sucès de lôr scuadre cuintri de Juve concuistât in graciis di un gol fat tal ultin minût de partide cuntun rigôr assegnât de bande dal arbitri par vie di un fal inesistent.

Cui che i ten al Udin – e soredut cui che i ten e che i sta daûr cuant che al zuie a Turin – nol à dificoltât a ameti di vê desideris di cheste fate, ancje su la fonde dai tancj patafs che la scuadre di balon furlane e à cjapât tra il Comunale, il Delle Alpi e il Juventus Stadium e des pocjis sodisfazions che e je rivade a cjapâsi simpri di chestis bandis.

Cence rivâ ae perversion ironiche e iperboliche de vitorie cuntun rigôr inesistent, domenie stade a Turin o vin vût un gra plasê e al è ancje par chel che o vin scugnût spietâ un pâr di dîs par scrivii parsore: o vevin di ripiâsi dal shock positîf e de fieste…

Une sodisfazion sù par jù compagne – e salacor ancjemò plui fuarte – le vevin vude tal 1997, cul Udin di Zaccheroni che in dîs cuintri undis dopo doi minûts di zûc (cartelin ros par Genaux) al vinceve 3-0 cun doi goi di Amoroso e un di Bierhof, intune partide che e viodeve ancje une travierse cjapade di Vieri su rigôr e un altri penalty di Zidane neutralizât di Turci dongje di une prestazion grandiose di dute la scuadre furlane, a tacâ de dôs pontis, dal puartîr e di difensôrs Calori e Rossitto.

22_03_014_udin_friul

L’incuintri di domenie stade al someave lâ daûr di un copion za viodût tantis voltis: l’Udin sierât in difese e la Juve parone dal balon e dal cjamp, che a fuarce di dâi e varès cjatât la strade dal gol o par merit di cualchi so zuiadôr o par vie di cualchi erorat dai “nestris” o ben cuntun jutori… dal cîl.

Impen cul passâ dai minûts il possès de bale de bande de Juve no si traduseve inte creazion e soredut inte realizazion di grandis ocasions di gol, no dome par vie che Karnezis al steve in vuaite, e ce dut l’Udin ‘barricadero’ e ‘catenacciaro’ al tignive bot, ma ancje parcè che Pogba, Coman, Mandžukič e Evra no rivavin a dâ il miôr di se, judâts in chest, soredut i atacants, de precision chirurgjiche dai intervents di Heurtaux e di Danilo.

Sierât il prin timp cence goi, cundut de pression puartade indenant cuntune cierte costance de bande di Lichtsteiner, intant che Di Natale al restave sbandonât indenant e Thereau al veve il dovê di tornâ a nivel de seconde linie, l’Udin al vierzeve la seconde frazion cun chê stesse ande e cun chê di resisti e di viodi di rispuindi in cualchi maniere

La muraie dai blancs e neris vistûts di blu e di zâl e continuave a fâi cuintri ai juventins che a jerin ancjemò plui confusionaris e imprecîs che tai prins cuarantecinc minûts, cundut de energjie gnove che e rivave di Dybala. Cun di plui, cuant che l’ex Pereyra al jere pront pal apontament cu la bale juste al cjatave ancje Bruno Fernandes, l’om just tal puest just, che i dineave la pussibilitât di lâ in gol.

Cussì la Juve e tacave a pierdi colps, l’Udin al cjatave il spazi par imbastî cualchi cuintripît e in cheste maniere al nasseve il gol dal un a zero: balon slargjât a man drete par Kone e par un so cross pinelât par Thereau, che al minût numar 78 le butave cence fastidis dentri dal sac daûr di Buffon.

A chel pont la Juve e provave a zuiâ la cjarte Lloriente, ma l’Udin al rivave dongje dal doi a zero cuntune biele conclusion di Kone e nancje tai minûts di recupar i parons di cjase a rivavin a mudâ chel che al è un risultât storic, sei pal Udin che par lôr, pe prime volte batûts in cjase te prime partide di campionât.

Prossime partide a Udin cuintri dal Palermo tal gnûf stadi che cualchidun al volarès clamâlu Dacia Arena. E che invezit al sarès miôr che finalmentri si indotàs di une biele segnaletiche bilengâl o plurilengâl, ven a dî ancje par furlan.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s