Ator al è miôr, il Premi Friûl al sielç i siei finaliscj

bandeeletriche3

«Ator al al è miôr». La seconde fase de edizion 2013 dal Premi Friûl si siere cuntun belanç parziâl une vore bon: al premie il sfuarç organizatîf di Onde Furlane, cu la poie de ARLeF (Agjenzie Regjonâl pe Lenghe Furlane), al conferme la validitât de intuizion di vê puartât ator pal Friûl il concors dedicât ae creativitât musicâl par furlan e in chês altris lenghis minoritariis dal Friûl e al da cont di un panorame musicâl dinamic e svariât.

Lis seradis dal fin di setemane stât, a Cormons e Comelians, a ribatin la bontât de formule – musiche dal vîf, presentadôrs brilants e ironics e public coinvolzût ad in plen – za sperimentade intes dôs datis di Cjasarse e Muçane. La liste dai finaliscj, che si confrontaran dal vîf ai 30 di Novembar li dal Palamostre si complete, daûr dai risultâts dai apontaments in place, inte localitât dal Friûl Orientâl, e a teatri, intal «piçul borc» là che al jere nassût Giorgio Ferigo. Dongje dal jazzcore che al pete dai Mataleao e dal blues spontani, scalembri e ingnervât di funk e rock dai zovins cjargnei Terenzio Blues Band, si cjataran fûr in finâl lis propuestis musicâls di Aldo Sbadiglio e la famiglia Ananas in vacanza a Dresda, Truc e Sons of a Gun.

????????????????

I prins a àn convinçût public e zurâts cu la lôr prestazion cormonese cuinçade di compatece sonore, ironie e presince seniche e a àn prevalût su El Scuadron de la Muerte, une vore inovatîfs ma ancjemò pôc rodâts dal vîf, sui The Hanus Pranus e su lis sugjestions indierock dai Sons of a Gun. Il cuartet che al ven des Vals dal Nadison, che al met dongje tescj par sloven e un sunôr sonic e abrasîf, a Cormons al à vuadagnât une segnalazion, cemût che intes seradis di prime al jere sucedût a Mig 29 Over Disneyland e Residui di Chernobyl, e pe jurie di esperts al à prevalût su chescj e cussì al à rivât a cjapâ il cuint puest in finâl, là che pe prime volte e sarà une band di lenghe slovene.
Il cuart biliet par Udin lu àn stacât i Truc, che a Comelians a àn passât Ad Plenitatem Lunae e Matteo Segrado in graciis di un set intens, che al testemonee la lôr gnove cressite, simpri in ecuilibri tra rock punk e influencis ‘desertichis’.

Il Premi Friûl Ator, la selezion live tra Cjargne, Basse, Friûl ocidentâl e Gurizan, al à in gjenerâl ufiert une panoramiche crodibile di cemût che il furlan e chês altris lenghis minoritariis dal Friûl (il sloven dai Sons of a Gun, ma ancje il todesc che al comparìs intal repertori dal Mataleao) a sedin lenghis vivis, che a vegnin dopradis in musiche in formis tant diferentis: dal folk ae cjançon di autôr fint al reggae e al rock intes sôs tantis gradazions. A cheste varietât di espressions, testemoneade ancje di cui par ogni semifinâl al à vût la funzion di ospit e di «santul» – ven a dî i mestris dal rock Pantan, il sbilf dal freestyle Dj Tubet, il supergrup metût adun di Fabian Riz e Orko Trio e i zovins dal blues Bande Eletriche – al corispuint il spirt di cui che al à condusût lis operazions sul palc: Isabelle Grattoni, Mojra B. , Gigi “Er Geggio” Patruno, il rapper DeK Ill Ceesa, il “Cjastron” Enrico Vueli di Clap e Daniel Samba.

Prime de finâl al è ancjemò un altri apontament pai 6 di Otubar a Vuanis, là che al sarà ‘E jo o cjanti (e o sai parcè)’, un laboratori cun musiciscj e esperts dut dedicât ae produzion musicâl par furlan tra passât, presint e avignî, confronts cun altris esperiencis europeanis e leams cu la tradizion musicâl e la poesie. Par savênt di plui: www.ondefurlane.eu/premifriul.

Advertisements

One thought on “Ator al è miôr, il Premi Friûl al sielç i siei finaliscj

  1. Pingback: Il biel dal Friûl e il brut de cuote 0,02 % | LIDRÎS E BUTUI

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s