Premi Friûl Ator, za doi finaliscj e ancjemò doi apontaments

PFCorW

A van indenant lis semifinâls de edizion 2013 dal Premi Friûl. Dopo dai apontaments de setemane stade a Cjasarse e Muçane, doman e domenie la manifestazion e rivarà a Cormons e a Comelians.

Des primis dôs seradis di Premi Friûl Ator, la fisionomie itinerante cjapade sù chest an de rassegne inmaneade di Radio Onde Furlane cu la poie de ARLeF, a son za saltâts fûr doi finalscj. A son Terenzio Blues Band e Mataleao che si son garantîts la partecipazion ae finâl dal Premi Friûl, che si davuelzarà ai 30 di Novembar alì dal Palamostre di Udin.

terenzio

Terenzio Blues Band al è un grup cjargnel, che al rive di Treli, intal Cjanâl di Incjaroi, e al propon un blues insaurît di sunete rude e pevarons che a bechin fuart e Mataleao a son de Basse e di agns di militance hardcore punk cumò miscliçade cun suns noise jazz. Buinis provis a son rivadis però ancje di chei altris musiciscj in concors: Residui di Chernobyl, Mig 29 over Disneyland, Sun Riot, Ensemble D’Anjou e Berto Celot. Fûr di dubi po la cualitât dai doi ospits speciâi des seradis, ven a dî Pantan e DJ Tubet.

Il concors al va indenant e al siere ta cheste fin di setemane lis sôs semifinâls ator pal Friûl. Il tierç apontament al è di fat in program a Cormons, sabide ai 7 di Setembar, inte suaze de Fieste de Ue. A tacâ des 8 e mieze di sere (20.30) a sunaran El Scuadron de la Muerte, Aldo Sbadiglio, The Hanus Pranus e Sons of a Gun. Ospits speciâi il bluesom Fabian Riz e i Orko Trio (Giorgio Pacorig, Michele Cuzziol, Enrico Giletti). A presentâ la serade a saran Mojra B e Daniel Samba.

PFComW

Domenie ai 8 di Setembar, la ultime semifinâl si davuelç in Cjargne dulà che a tacâ di nûf di sere (21.00) alì de Sale L’Alpina di Comelians a sfidâsi a saran Ad Plenitatem Lunae, Matteo Segrado e Truc. Dopo di lôr e sunarà La Bande Eletriche, la formazion vincidore de edizion 2012 dal Premi Friûl che che pe ocasion e presente il so prin lavôr. Conduzion de serade par cure di Isabelle Grattoni e dal rapper DeK Ill Ceesa.

Al Premi Friûl si pues partecipâ ancje in rêt, baste clicâ su www.ondefurlane.eu/premifriul/ là che al è pussibil scoltâ un toc par ognidun dai partecipants e votâ il  grup o il solist che al plâs di plui. Al vincidôr i larà il Premi dal Public, assegnât intant de serade finâl.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s