Udinese – Parma 3-1

fuarceudinees

Trê goi fats e un cjapât par une vitorie che e fâs ben ae scuadre e ai siei tifôs. L’Udin al zuie la prime partide in cjase cemût che al veve di fâ, sei par puartâ a cjase i prins trê ponts dal gnûf campionât che soredut, par parâ vie la fantasime de eliminazion de Europa League.

Cûr, çurviel e gjambis a zirin avonde ben e la pression de scuadre furlane, che e je decise ancje se no cussì fuartonone, e puarte Badu a cjapâ la iniziative juste dopo undis minûts: un a zero. La ande de partide no je a ritmis masse fuarts, l’Udin al ten bot e il Parma nol ven fûr in maniere pericolose, fale che intune azion ofensive, là che i blancs e neris a àn un tic di fortune (une volte tant…): al 22′ il balon tocjât cul cjâf d Amauri al sbat parsore de travierse. Cinc minûts plui tart al rive ancje un pâl cjapât cuntun biel diagonâl di Di Natale, che al siere ben une orchestrazion blancje e nere, ma nol è masse fortunât. Il prin timp si siere intune situazion avonde ecuilibrade: l’Udin al gjestìs il risultât e il Parma al prove a fâi cuintri cun Cassano, ma no i rive.

Il secont timp si vierç cul Parma plui decîs e plui pericolôs. L’Udin al cale, tal complès, ma no si fâs meti tal sac e anzit al rispuint ae incressite de pression dal Parma propit cui siei zuiadôrs che a àn stentât di plui cul Liberec: Kelava, che al 55′ siere ben in jessude cuintri di Rosi, e Heurtaux, che dongje di zuiâ une buine partide in difese al marche la sô ‘serade sì’ ancje cuntun gol, che al rive al 72′ a conclusion di une punizion di Maicosuel. Il doi a zero al rive dopo un pâr di azions firmadis di Muriel e Maicosuel, che dal 69′ al è in cjamp al puest di un Di Natale un pôc flaput. Il Parma al prove a ridusi il svantaç e al rive a scurtâ la distance cun Cassano a vot minûts de fin. Al è masse tart pai emilians, ancje parcè che al 43′ l’Udin al vuadagne un rigôr e dai undis metris Muriel al fâs trê a un.

E cumò? Sodisfazion parcè che l’Udin al è ancjemò vîf e nol è chel di Liberec. Ma ancje: atenzion a no montâsi il cjâf, parcè che a son diviersis lis robis di meti ancjemò a plomp. Par esempli lis cundizions dai singui, a tacâ di Di Natale, e cierts mecanisims tatics, par no fevelâ dal pericul (ma dome par pocjis oris) di pierdi ancjemò cualchi zuiadôr impuartant daûr di logjichis (??) di marcjât. Tra i elements positîfs a meretin ricuardâts la energjie mostrade nossere de bande di Muriel, Maicosuel, Badu e Basta e la polse dal campionât par vie dai impegns de rapresentative taliane che e permet di lavorâ cun calme e cun continuitât. Ce che al nas, al devente…

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s